Koronavirus pandemiyasi qachon tugaydi? Insoniyat bu xavfli kasallikdan qachon batamom xalos boʻladi? Mana, ikki yildirki, ana shu savollarga asosli javob qidiryapmiz.

Ayniqsa, kasallik qayta bosh koʻtarib, yer yuzining deyarli barcha nuqtalarini yangi shtamm “zabt etgan” murakkab bir vaziyatda bu mavzu yana kun tartibiga chiqqan.

Kecha Jahon sogʻliqni saqlash tashkiloti bosh direktori Tedros Gebreyesus shu haqdagi xulosalarini bayon qildi. Uning aytishicha, pandemiya hali tugamaydi. Chunki koronavirusning «omikron» shtammidan soʻng COVID-19ning yangi-yangi mutatsiyalari paydo boʻlishi mumkin.

Shuningdek, JSST rahbari fikricha, «omikron» avvalgi mutatsiyalarga qaraganda ogʻir asoratlarni nisbatan kam keltirib chiqarayotgan boʻlsada, uni yengil kasallik, deya xotirjamlikka berilmaslik kerak.

Negaki, bir hafta ichida dunyoda COVID-19ni yuqtirish holatlari 20 foizga oshgan. Yaʼni bu davr ichida 18 milliondan ortiq kishida koronavirus infeksiyasi aniqlangan.

«Toʻgʻri, oʻlim holatlari dinamikasi u qadar tez oʻsayotgani yoʻq, — dedi T.Gebreyesus. — Yaʼni hafta davomida bu boradagi koʻrsatkich 4 foizga oshib, 45 ming bemor ushbu xastalik tufayli hayotdan koʻz yumdi. Ammo shuning oʻzi ham juda katta yoʻqotishdir».

Jorj Vashington universiteti professori, virusolog Konstantin Chumakovning xulosasiga koʻra, «omikron» boshqa shtammlardan farqli oʻlaroq pnevmoniyani keltirib chiqarmaydi.

“Hozir koʻpchilikda kasallik yengil shaklda kechmoqda. Qolaversa, agar ilgari kasallanganlarning 2 foizga yaqini vafot etgan boʻlsa, hozir bu koʻrsatkich 0,1 foiz atrofida”, — deydi virusolog.

Shu bilan birga, Chumakov «omikron» yoshlarda keksalarga qaraganda ancha osonroq oʻtayotganini qayd etdi.

Rossiyalik immunolog Nikolay Kryuchkovning xulosalari ham shunga yaqin. U «omikron» shtammi yuqori nafas yoʻllarining shilliq pardalari hujayralarida faolroq tarqalishi, shu sababli bu shtammga chalingan bemorlarda kasallik yengil kechishini aytdi.

Immunologning fikricha, yangi variant “delta” bilan solishtirganda yuqori nafas yoʻllarining shilliq qavatlari hujayralarida yaxshiroq, oʻpkada esa yomonroq koʻpayadi. Yapon olimlarining laboratoriya sharoitida oʻtkazgan tadqiqotlari natijasi buni tasdiqlaydi.