Foto: IIV matbuot xizmati

Ijtimoiy tarmoqlarda ichki ishlar boshqarmasi xodimlariga mahalliy aholi tosh otgani aks etgan video tarqaldi. Voqea yuzasidan Andijon viloyati IIB matbuot xizmati izoh berdi.

Maʼlum boʻlishicha, Baliqchi tumani “Aʼlam” mahallasida yashovchi fuqaro tuman Suvoqova tashkilotiga tegishli boʻlgan suv qazib chiqarish inshooti va hududini oʻzi yashaydigan hududga noqonuniy ravishda devor bilan oʻrab, qoʻshib olgan. Toʻsiq suv taʼminoti bilan bogʻliq avariyalarni tuzatishga toʻsqinlik qilgani uchun hudud aholisi va huquqbuzar oʻrtasida nizo kelib chiqqan.

2021-yilda sud mahalla ahli foydasiga qaror chiqargan va noqonuniy binoni buzishga qaror qilgan. Biroq erkak devorni buzishga ruxsat bermagan.

2022-yil 28-yanvar kuni MIB xodimlari sud qarori asosida devorni buzish talabi bilan kelgan. Bu vaqtda huquqbuzar mahalla ahli bilan janjallashib qolgan, natijada qoʻshnilar devorga tosh otishni boshlagan. Janjalni IIB xodimlari toʻxtatgan.

Ichki ishlar boshqarmasi xodimlari tosh otmagan va ularga hech narsa tegmagan. Ayni damda tergovga qadar tekshiruv ishlari olib borilmoqda, deyiladi matbuot xizmati xabarida.