Фото: Бош прокуратура матбуот хизмати

Ўзбекистон Республикаси Бош прокуратураси, БМТнинг Тараққиёт дастури билан ҳамкорликда «Марказий Осиё давлатларида зўравонликка қарши курашишда полициячи-аёлларнинг ўрни» мавзусида онлайн давра суҳбати ўтказилди.

Унда БМТ Тараққиёт дастурининг Марказий Осиё давлатлари, Истанбул, Сеул офислари вакиллари, Босния ва Герецеговина, Қозоғистон, Қирғизистон, Тожикистон Республикалари Ички ишлар вазирликлари ходимлари ҳамда Ўзбекистон Республикаси Ички ишлар, Маҳалла ва оилани қўллаб-қувватлаш вазирликлари, шунингдек, нодавлат нотижорат ташкилотлари вакиллари иштирок этди.

Ўзбекистон Республикаси Бош прокуратураси ва Ички ишлар вазирлиги вакиллари мамлакатимизда кейинги беш йилда хотин - қизлар муаммоларини ҳал этиш ва ижтимоий қўллаб-қувватлаш, уларнинг ҳуқуқларини таъминлашда давлат органлари масъулиятини кучайтириш, фуқаролик жамияти институтларининг ролини ошириш, аёлларга нисбатан зўравонлик ва тазйиқнинг ҳар қандай кўринишига барҳам бериш борасида Ўзбекистон тажрибаси билан ўртоқлашди.

Хорижий мамлакатлар мутахассислари Республика хотин-қизлар жамоатчилик кенгаши таркибида, Бош прокурор ўринбосари раҳбарлигидаги Оилавий зўравонликни олдини олиш ва оилавий зўравонликдан жабр кўрганларга амалий кўмак бериш бўйича ишчи гуруҳ фаолияти, Ички ишлар вазирлиги тизимида Хотин-қизлари масалалари бўйича алоҳида бошқарма тузилганлиги, унда 348 нафар аёл инспекторлар хизмат қилаётганлиги, давлат бошқаруви соҳасида аёл раҳбар кадрларнинг сони 27 фоизга етганлиги билан қизиқиб, Ўзбекистон тажрибасини ўрганишга қизиқиш катта эканлигини таъкидлашди.

Бош прокурор ўринбосари Светлана Артикова раҳбарлигидаги Ишчи гуруҳ томонидан илғор хорижий мамлакатлар билан тажриба алмашишда халқаро экспертлар билан ишлаш, оиладаги зўравонликнинг олдини олиш тизимининг самарадорлигини ўрганиш, Президентнинг соҳага оид норматив-ҳуқуқий ҳужжатлари ва ташаббусларининг ўз вақтида ва сифатли бажарилиши устидан доимий мониторингни таъминлаш, норматив-ҳуқуқий базани такомиллаштириш, ҳуқуқни қўллаш амалиёти самарадорлигини ошириш, фуқароларнинг ўзини ўзи бошқариш органлари фаолиятини кучайтириш, ахборот-коммуникация технологиялари орқали электрон мурожаатлар юбориш имконияти яратилишини таъминлаш ва бошқа шу каби вазифаларни амалга оширишда ўз фаолиятини давом эттирмоқда.