Фото: “Yonhap”

Сеул марказий туман суди Жанубий Корея собиқ президенти Юн Сок Ёлни 2024 йил декабрида ҳарбий ҳолат жорий этиш орқали исёнга раҳбарлик қилганликда айбдор деб топиб, умрбод қамоқ жазосига ҳукм қилди. Бу ҳақда “Yonhap” хабар берди.

Ҳукм 2024 йил 3 декабрда кутилмаган тарзда ҳарбий ҳолат эълон қилинганидан 14 ой ўтиб чиқарилди. Махсус прокурорлар унга нисбатан ўлим жазосини сўраган эди, бироқ суд енгилроқ жазо қўллади.

Юн Сок Ёл ўшанда ҳарбий ҳолат жорий этиш қарорини “давлатга қарши кучларни бартараф этиш” зарурати билан изоҳлаган, аммо Миллий ассамблея овоз бериш орқали уни олти соатдан кейин бекор қилган. Суд раиси Жи Кви Ённинг таъкидлашича, Юн Миллий ассамблея фаолиятини ҳарбий куч юбориш орқали тўсиб қўйиш ва асосий сиёсатчиларни ҳибсга олиш орқали унинг ишини издан чиқаришни кўзлаган. Суд, шунингдек, у ҳарбийларни жалб этиш орқали тартибсизлик келтириб чиқарганини қайд этган.

Суд ҳарбий ҳолат эълонининг ўзи исён ҳисобланмаслигини, аммо Юн Сок Ёл билан боғлиқ ҳолатда у конституциявий орган фаолиятини издан чиқаришни мақсад қилгани сабабли шундай малакаланганини билдирган. Судьянинг сўзларига кўра, собиқ президент жиноятни шахсан режалаштирган ва кўплаб шахсларни бунга жалб қилган, фавқулодда ҳарбий ҳолат эса жамиятга улкан ижтимоий зарар етказган.

Шу билан бирга, суд режа пухта ишлаб чиқилмагани, жисмоний куч ишлатиш чеклангани, Юннинг муқаддам судланмагани, ўнлаб йиллар давлат хизматида ишлагани ва 65 ёшда эканини инобатга олган. У билан бирга яна етти нафар айбланувчига ҳам ҳукм ўқилган. Хусусан, Собиқ мудофаа вазири Ким Ён Хён 30 йилга, собиқ Миллий полиция агентлиги раҳбари Чо Жи Хо 12 йилга, Сеул полицияси собиқ раҳбари Ким Бон Сик 10 йилга қамалган.