Фото: Getty Images

Япония шифокорлари касаба уюшмаси раҳбари Наото Уэяма Олимпиадани Токиода ўтказиш эпидемиологик вазиятни жиддий равишда мураккаблаштириши ва ҳатто коронавируснинг «олимпия» штаммининг пайдо бўлишига сабаб бўлиши мумкинлиги ҳақида огоҳлантирмоқда.

Уэяманинг айтишича, спорт тадбирига 200 мамлакатдан вакиллар келади. Шундай экан, Японияга дунёнинг турли мамлакатларидан CОВИД-19 вариантлари олиб келинади.

«Вируснинг турли жойларда мавжуд бўлган барча мутант штаммлари Токиода бирлашади. Олимпия ўйинларидан кейин пайдо бўладиган янги штамм пайдо бўлиш эҳтимолини ҳам инкор эта олмаймиз», дейди у.

Олдинроқ, Янги Зеландиянинг Отаго университети профессори, эпидемиолог, мамлакат ҳукумати маслаҳатчиси Майкл Бейкер ҳам ушбу масалага тўхталиб ўтган эди. Унинг таъкидлашича, жорий йилнинг ёзида Токиода Олимпиада ўйинларини ўтказиш ҳозирги эпидемиологик шароитда бемаънилик ва бундай қарорнинг қиймати инсонлар ҳаёти билан тенг.

Коронавирус пандемияси сабабли 2020 йил 24 мартида Токиода бўлиб ўтадиган ёзги Олимпия ўйинларини 2021 йилга қолдиришга қарор қилинди. Мусобақани жорий йилнинг 23 июль — 8 август кунлари ўтказиш режалаштирилган. 

Аммо японияликлар Олимпиадани ўтказишни қўллаб-қувватламаяпти. Хусусан, сўровларда японларнинг қарийб 80 фоизи Олимпиадани кейинга қолдирилишини ёки умуман бекор қилинишини исташини билдирган.