Жаҳон соғлиқни сақлаш ташкилоти Nipax ёки NiV деб номланувчи вирус туфайли янги пандемия келиб чиқиши мумкинлиги ҳақида огоҳлантирди, деб ёзади «Известия».

Ушбу вирус илк бор 1999 йилда Малайзиянинг Нипах дарёси бўйида чўчқа боқиш билан шуғулланган фермерлар орасида аниқланганди. Касалликнинг номи ҳам шундан келиб чиққан. Шундан сўнг Жанубий Осиёда мазкур инфекция тарқалган 12 та ўчоқ пайдо бўлган.

Маълум қилинишича, NiV'га чалинган беморлар ўртасида ўлим кўрсаткичи 40 — 75 фоизни ташкил этади. Боз устига, у жуда тез тарқалади. Инфекция ҳам белгисиз кечиши, ҳам ўлимга олиб келувчи энцефалит(бош миянинг яллиғланиши)ни келтириб чиқариши мумкин. Ҳозирча унга қарши дори яратилмаган.

Учар тулкилар(худди кўршапалаклар каби қўлқанотлилар туркумига кирувчи сут эмизувчи) вируснинг табиий тарқатувчилари ҳисобланади. Улар асосан Жанубий Хитой, Жануби-шарқий Осиё, Янги Гвинея, Австралия ва Африкада кенг тарқалган бўлиб, мевалар нектарлари билан озиқланади. Бу махлуқларнинг ўзларига эса инфекция салбий таъсир қилмайди.

Олимларнинг вирус одамларга касал чўчқалар, шунингдек, мевалар(биринчи навбатда хурмо(финик), финик пальмаси шарбати) истеъмолидан сўнг юққанини аниқлашган.

ЖССТ NiV'дан профилактика қилиш учун учар тулкиларни финик пальмаси ва бошқа сархил озиқ-овқат маҳсулотларига иложи борича яқинлаштирмасликни тавсия этмоқда. Янги йиғиб олинган финик шарбатини қайнатиш, меваларини эса ювиш ҳамда тановвул қилишдан олдин пўстлоғини олиб ташлаш керак.

Жаҳон соғлиқни сақлаш ташкилоти ўз навбатида вирусни одамдан одамга юқиш хавфини камайтириш йўлларини ҳам айтди. Бунинг учун NiV инфекцияси билан касалланган бемор билан алоқа қилишдан тийилиш, қўлларни доим ювиб юриш ва индивидуал ҳимоя воситаларидан фойдаланиш зарур.