Иллюстратив фото

"Johnson & Johnson" компаниясининг коронавирус инфекциясига қарши экспериментал вакцинанинг клиник синовлари муваффақиятли кечаётганини маълум қилди. 

"MedRXiv" тиббий порталида эълон қилинган натижаларга кўра, синовларда 800 киши қатнашган. Улар икки гуруҳга бўлинган: биринчисига 18 ёшдан 55 ёшгача бўлганлар, иккинчисига 65 ёшдан ошганлар киритилган.

Таъкидланишича, "Covid-19" вакцинаси клиник синовларнинг биринчи ва иккинчи босқичларида деярли барча иштирокчиларда барқарор иммунитетга жавобан таъсир кўрсатган. Хусусан, 18 ёшдан 55 ёшгача бўлган синов иштирокчиларининг 99 фоизида вакцина қабул қилганидан кейин 29 кун ичида уларда антитаначалар пайдо бўлган.

Компания томонидан аниқлик киритилишича, кузатув жараёнида айрим ножўя таъсирлар, масалан, бош оғриғи, иситма, ҳолсизлик ва танада оғриқ кузатилган. Аммо булар  бир неча кундан кейин йўқолган.

"Johnson & Johnson" ўтган чоршанба куни ўз вакцинасини клиник синовларининг учинчи босқичини бошлади. Режага кўра, компания вакцинани 2021 йил бошида сертификатлаш учун тақдим этишни режалаштирмоқда.

Аввалроқ, АҚШнинг "Novavax" компанияси ҳам коронавирусга қарши вакцина синовининг учинчи босқичини бошлаган эди.