Бош прокуратура ҳузуридаги Департаментнинг Жиззах шаҳри бўлими ва Миллий гвардия вилоят бошқармаси ходимлари билан ҳамкорликда тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унга кўра, ўтказилган тезкор тадбир давомида валюта айирбошлаш билан шуғулланиб келган муқаддам судланган фуқаро И.С. 10 минг АҚШ долларини 129,2 миллион сўмга сотган вақтида ушланган. Аниқланишича, унинг ёнидан сотишга мўлжаллаган 5 минг 563 АҚШ доллари ва 7,8 миллион сўм пуллар борлиги ойдинлашиб, жами 15 минг 563 АҚШ доллари ва 7,8 миллион сўм пуллар ашёвий далил сифатида олиб қўйилган.

Шу каби яна бир ҳолат, Департаментнинг Андижон шаҳри бўлими ва ИИБ ходимлари ҳамкорлигида ўтказилган тезкор тадбирда ҳам аниқланган.

Унда, валюта айирбошлаш билан шуғулланиб келган фуқаролар Қ.А. ва А.Э. фуқаро Я.Ю.га 4 минг АҚШ долларини 51,5 миллион сўмга сотган вақтида ашёвий далиллар билан қўлга олинган.

Бундан ташқари, Департаментнинг Навоий вилояти бошқармаси томонидан «Маликработ» МФЙ ҳудудида ўтказилган тезкор тадбирда валюта айирбошлаш билан шуғулланиб келган фуқаро Ж.И. фуқаро Ш.С.га 3 минг 400 АҚШ долларини 44,2 миллион сўмга сотган вақтида ашёвий далиллар билан ушланган.

«Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан билан жиноят ишлари қўзғатилиб, тергов ҳаракатлари ўтказилмоқда», — дейилади Департамент хабарида.