ҲАМАС ҳаракати вакили Сами Абу Зуҳрийнинг маълум қилишича, агар Ғазо секторига киришнинг хавфсизлиги таъминланса ҳамда ҳудуд тўлақонли қўллаб-қувватланса вайрон бўлган ҳудудларнинг тўлиқ тикланишига 5 йилдан 7 йилгача вақт кетади. Бу ҳақида у «Hurriyet» газетасига берган интервьюсида гапириб ўтган.

Ҳаракат вакилининг сўзларига кўра, вайрон бўлган ҳудудлар остидан ҳалок бўлганларнинг жасадларини олиб чиқиш ҳамда жароҳатланганларга тиббий ёрдам кўрсатиш учун зарур бўлаётган тиббий ва техник жиҳозлар Исроил ҳукуматининг тақиқлари сабаб Ғазо секторигача етиб бормаган.

«Исроил Ғазо аҳолисига шу йўл билан босим қилмоқда. Агар керакли амалиётларнинг бажарилишига тўсқинлик қилинмаса, чегаралар очилиб, барча керакли жиҳозлар камчиликларсиз етиб келса, Ғазо секторининг тикланиши 5-7 йил ичида якунланиши мумкин», — дейди у.

Бундан ташқари, ҲАМАС вакили Дональд Трампнинг Ғазога қўшин жойлаштириши ҳақидаги фикрига ҳам муносабат билдирган.

«Трамп бу сўзларни жиддий айтмади деб, умид қиламиз. Биз Исроил босқинидан озод бўлиш учун йиллар давомида курашдик. Ҳудудимизни яна бир бор ишғол қилинишига йўл қўймаймиз. Трампнинг баёнотлари адолатсиз ва ҳақоратдан бошқа нарса эмас», — дейди Сами Абу Зуҳрий.