Украина президенти Владимир Зеленский Украинага НАТОга аъзолик ҳуқуқи берилса, эгаллаб турган президентлик лавозимидан кетишини маълум қилди. Бу ҳақида «Al Jazeera» нашри хабар берди.

«Украинанинг НАТОга аъзо бўлиши, мен ўз олдимга қўйган вазифамни бажарганимни англатади», — деган Зеленский.

Шунингдек, Украина етакчиси АҚШ президенти Дональд Трамп билан Оқ уйдаги можароли музокараларига қарамай, Қўшма Штатлар билан фойдали қазилмалар бўйича битим имзолашга тайёрлигини ҳам маълум қилган.

«Ўтмишда содир бўлган воқеаларга қарамасдан, бизнинг АҚШ билан сиёсатимиз давом этади. Биз битим тузишга розимиз, умид қиламанки Қўшма штатлар ҳам бунга монелик қилмайди», —деган у.

Шунингдек, Зеленский журналистлар билан суҳбати чоғида Дональд Трамп билан муносабатларни сақлаб қолиш мумкинлигига ва унинг маъмурияти Киевга ёрдамни тўхтатмаслигига ишонч билдирган.

«Ўйлайманки, АҚШ ва Украина ўртасидаги муносабатларимиз давом этади. Ўзаро ҳамкорлигимиз яқинда бўлиб ўтган музокаралар чоғида айтилган гаплардан устунроқ деб биламан. Украина дунёдаги энг катта давлат эмас, лекин унинг мустақиллик учун қандай кураш олиб бораётганини бутун дунё кўриб турибди», — дейди Зеленский.

Эслатиб ўтамиз, аввалроқ, Оқ уй матбуот котиби Каролин Левитт АҚШ Украинага юборилаётган ҳар қандай ҳарбий ёрдамни тўхтатгани ҳақида маълумот берган эди.