Жорий йилнинг 11 март куни Фарғона вилояти Учкўприк туманида муқаддам бир неча бор судланган хавфли рецидивист ўғирлик содир этди. Бу ҳақда Олий суд матбуот котиби Азиз Обидов маълум қилди.

Маълум қилинишича, бунга қадар 5 марта судланган 43 ёшли фуқаро Ғ.П. маст ҳолатда А.А.га тегишли баҳоси 1 млн сўмлик велосипедни яширин равишда талон-торож қилган.

Шундан сўнг у уйига етиб келиб мастлиги сабабли дарҳол ухлаб қолган. Кечаси уйқудан туриб велосипедни яшаш хонадонининг қурилиши битмаган хонасига олиб кириб қўйган.

Ҳолат бўйича ўтказилган суд мажлисида айбига тўлиқ иқрор бўлган Ғ.П. велосипедни эгасига қайтариб бергани, ҳозирда етказилган зарар тўлиқ қопланганини билдирган. Шунингдек, у қилмишидан чин кўнгилдан пушаймонлигини айтиб, суддан енгиллик беришни сўраган.

Мажлисда судланувчи Ғ.П.нинг иши ҳар томонлама кўриб чиқилиб, у Жиноят кодексининг 169-моддаси (Ўғрилик) 3-қисми “а” бандида кўрсатилган жиноятни содир этганликда айбдор деб топилган. Судда унга қонун санкциясида кўрсатилган тартибда озодликдан маҳрум қилиш жазоси тайинланган.

Фарғона вилоят судининг жиноят ишлари бўйича судлов ҳайъати судьяси Нодиржон Раимқуловнинг қўшимча қилишича, қилган ишидан пушаймон бўлган Ғ.П. ўзига нисбатан озодликдан маҳрум қилиш билан боғлиқ бўлмаган жазо тайинланишини сўраб вилоят судига апелляция тартибида шикоят киритган. Бироқ унинг шикояти қаноатлантиришсиз, тайинланган жазоси ўзгаришсиз қолдирилган.