Туркиялик машҳур актёр Бурак Денизнинг наркотик моддаларга топширган таҳлил натижалари ижобий чиқди. Унинг организмида кокаин излари аниқланган, деб хабар бермоқда «AHaber» телеканали.

Актёр жорий йилнинг 9 апрель куни бир қатор машҳур шахслар билан бирга наркотик моддаларни истеъмол қилиш ва тарқатишда гумонланиб қўлга олинган эди. Телеканал маълумотига кўра, Денизнинг таҳлилларида марихуана ва кокаин истеъмоли излари аниқланган.

Маълум қилинишича, актёр тергов давомида полиция бўлимида мунтазам қайд этилиб туриш шарти билан озодликка чиқарилган. Шу каби эҳтиёт чораси 9 апрель куни ушланган яна тўрт нафар шахсга, жумладан марихуана ва кокаин истеъмолида қўлга тушган актриса Серра Пиринчга нисбатан ҳам қўлланилган.

Истанбул шаҳар бош прокурори Фатих Дёнмезнинг билдиришича, текширувдан ўтган туркиялик машҳурларининг 77 фоизида наркотик моддаларга оид таҳлиллар ижобий чиққан. Тергов доирасида жами 250 нафардан ортиқ шахс қўлга олинган.

Қайд этиш жоиз, Туркия полицияси 2025 йил октябридан буён кенг кўламли наркотикларга қарши рейдлар ўтказмоқда. Бунга қадар наркотик истеъмолини тан олганидан сўнг, «Cennetin Çocukları» сериали актёри Исмоил Ҳожиоғлу ҳамда «Kızılcık Şerbeti» сериали актёри Доғукан Гюнгёр бош роллардан четлатилган эди.