Фото: Reuters

АҚШнинг собиқ президенти Дональд Трампнинг Ғазо секторидаги можарони ҳал этиш имкониятлари Оқ уйнинг ҳозирги раҳбари Жо Байденникига қараганда кўпроқ.

Бу “Wall Street Journal“ нашри томонидан ўтказилган сўров натижаларида маълум бўлди.

Сўров натижаларига кўра, респондентларнинг 44 фоизи Трамп Фаластин — Исроил можаросини ҳал эта олади, деб ҳисоблайди. Шу билан бирга, респондентларнинг 32 фоизи Байден Яқин Шарқдаги инқирозни бартараф эта олишига ишонади. Сўров 29 ноябрь — 4 декабрь кунлари рўйхатга олинган 1500 нафар сайловчи ўртасида ўтказилди.

Яқин Шарқдаги вазият 7 октябрь куни Ғазо секторидан Исроилга Фаластиннинг ҲАМАС ҳаракати жангариларининг кириб келиши, Исроил билан чегарадош ҳудудлар аҳолисининг ўлдирилиши ва 200 нафардан ортиқ, жумладан, болалар, аёллар ва қарияларнинг гаровга олин олиниши билан кескин ёмонлашди. ҲАМАС ҳужумни Исроилнинг Қуддусдаги Ал-Ақсо масжидига қарши ҳаракатларига жавоб деб атади.

Исроилда, расмийларнинг сўнгги маълумотларига кўра, ҲАМАС ҳужумлари оқибатида тахминан 1,2 минг киши ҳалок бўлган, бу рақам тинч аҳоли, аскарлар, чет эл фуқаролари ва ишчиларни ўз ичига олади. Шунингдек, 5 мингдан ортиқ одам тан жароҳати олган.

Бунга жавобан Исроил мудофаа кучлари Ғазо секторида ҲАМАСга қарши “Темир қиличлар” операциясини бошлади. Бир неча кун ичида Исроил ҳарбийлари Ғазо билан чегарага яқин бўлган барча аҳоли пунктларини назорат остига олди ва чизиқдаги нишонларга, жумладан, тинч аҳолига ҳаводан зарбалар беришни бошлади. Шунингдек, Исроил Ғазо секторини тўлиқ блокадага олганини эълон қилди: сув, озиқ-овқат, электр энергияси, дори-дармон ва ёқилғи етказиб бериш тўхтатилди.

Октябрь ойининг охирида Исроилнинг анклавдаги операциясининг қуруқлик босқичи бошланди. Ғазо шаҳри Исроилнинг қуруқликдаги кучлари томонидан ўраб олинган ва анклав амалда жанубий ва шимолий қисмларга бўлинган.

Исроил ҳужумлари бошланганидан бери Ғазо секторида ҳалок бўлганлар сони 16 мингдан ошди, 35 мингдан ортиқ киши жароҳат олди. ҲАМАС Ғазо секторида 200-250 нафарга яқин одамни гаровда ушлаб тургани даъво қилинди. Сулҳ тугаганидан кейин Исроил ҳукумати 126 нафар исроиллик ва 11 нафар хорижлик ҲАМАС қўлида қолаётганини, гаровга олинганларнинг 110 нафари эса қўйиб юборилганини маълум қилди.