АҚШ президенти Дональд Трамп Украина етакчиси Владимир Зеленский билан Оқ уйдаги Овал кабинетида музокара ўтказди. «РБК Украина» нашрининг маълум қилишича, ушбу учрашув баҳс-мунозараларга бой ўтган.

Унга кўра, Владимир Зеленский ўт очишни тўхтатиш сулҳига тайёр эмаслигини ҳамда Киев бу сулҳга рози бўлиши учун Вашингтондан хавфсизлик кафолати беришини талаб қилди.

Дональд Трамп Зеленскийнинг бу сўровига жавобан АҚШга етарлича ҳурмат кўрсатмаётганини ва Америкага ўзини қандай тутиши бўйича кўрсатма беришга ҳаққи йўқлигини айтган. Шундан сўнг ҳар икки раҳбар ўртасида «даҳанаки жанг» бошланган.

«Биз сизга 350 миллиард доллар бердик, сиз ҳозир қийин аҳволдасиз. Сиз бизга мен буни хоҳлайман, шуни хоҳлайман, деб айта олмайсиз. Бизсиз қўлингизда карталар йўқ, биздан миннатдор бўлишингиз керак. Ё биз бу битимни тузамиз ёки сиз ундан чиқасиз», — дейди Трамп.

Украина етакчиси Трампнинг бу нутқига «Мен бу ерга карта ўйнаш учун келганим йўқ», — деб жавоб қайтарган.

Шунингдек, Трамп журналистларнинг «Агар сулҳ тузилмаса Украинага яна қурол-аслаҳа юборасизми?», деган саволига «Ҳа, биз кўпроқ қурол юборишимиз мумкин, лекин буни хоҳламаяпмиз. Урушни тезда тугатиб, бошқа ишлар билан шуғулланишимиз керак», — дея жавоб берди.

Учрашув давомида Трампга «Украина ва Россия ўртасида воситачимисиз ёки Украина томонидасизми?», деган савол ҳам берилди. Трамп эса воситачи эканлигини ва ҳеч кимнинг тарафини олмоқчи эмаслигини билдирган.

«Мен Россия ва Украина ўртасидаман. Ҳеч ким ҳақида ёмон сўз айтмоқчи эмасман», — дейди у.

Учрашув якунида Зеленский Трамп айтган ўт очишни тўхтатиш ва сулҳ тузишга қарши чиқиб, Россия барибир бу сулҳни бузади, деб ҳисоблашини маълум қилди.

«Бизга шунчаки ўт очишнинг тўхтатилиши керак эмас. Бундай сулҳ тузиб кўрганмиз, Путин уни 25 марта бузган», — дейди Зеленский.

Мазкур учрашув Дональд Трампнинг Зеленскийни Учинчи жаҳон урушини бошлаш билан ўйнашаётганликда айблаб, бу ҳолат телевидение учун ажойиб шоу бўлади, деган сўзлари билан ўз якунига етган.

Украина етакчиси ушбу учрашувдан сўнг ижтимоий тармоқдаги саҳифаларида пост ёзиб, АҚШга ўз миннатдорчилигини билдирди.

«Қўллаб-қувватлаганингиз ҳамда бу ташриф учун раҳмат. Президентга, Конгрессга ва Америка халқига ташаккур. Украинага адолатли ва узоқ муддатли тинчлик керак ва биз айнан шу мақсадда ишлаяпмиз», — деб ёзган Владимир Зеленский.