Архив фото

АҚШ президенти Доналд Трамп Ҳўрмуз бўғозида эълон қилинган денгиз блокадасидан ташқари, Эронга чекланган ҳужумларни қайта бошлашни кўриб чиқмоқда. Бу ҳақда “The Wall Street Journal” нашри хабар бермоқда.

“Трамп ва унинг маслаҳатчилари тинчлик музокараларидаги боши берк кўчага киришни тўхтатиш учун АҚШнинг Ҳўрмуз бўғозини блокада қилишидан ташқари, Эронга чекланган ҳарбий ҳужумларни қайта бошлашни кўриб чиқмоқдалар”, — дейилади нашр эълон қилган мақолада.

Нашрда таъкидланишича, бу АҚШ раҳбари 12 апрель куни Покистондаги музокаралардан бир неча соат ўтгач кўриб чиққан вариантлардан бири. Мақолада қўшимча қилинишича, Трамп тўлиқ кўламли бомбардимон кампаниясини қайта бошлаши мумкин, аммо манбаларга кўра, бу минтақанинг янада беқарорлашиши ва президентнинг узоқ давом этган ҳарбий можароларга аралашишни истамаслиги туфайли эҳтимолдан йироқ.

Бир кун олдин Оқ уй раҳбари Ҳўрмуз бўғозини блокада қилишни эълон қилди. Унинг таъкидлашича, АҚШ ҳарбийлари ундан фойдаланишга уринаётган ҳар қандай кемаларни тўхтатади.

Ушбу ҳафта охири Покистонда АҚШ билан бўлиб ўтган музокаралардан сўнг, Эрон ташқи ишлар вазирлиги вакили Исмоил Бағайи икки томон бир нечта муҳим масалалар бўйича келишмовчиликларга дуч келганини айтди. Унинг сўзларига кўра, суҳбат ишончсизлик муҳитида ўтган ва бу сафар ҳеч ким келишувга эришишни кутмаганди.

“Reuters” агентлигининг хабар беришича, икки томон Ҳўрмуз бўғози, ядровий масалалар, товон пули, санкциялар ва можарога чек қўйиш масалаларини муҳокама қилишди. Аввалроқ, Эроннинг ўн банддан иборат режаси келажакдаги келишувнинг асосини ташкил қилиши мумкинлиги ҳақида хабар берилган эди.