Бугун Тошкент шаҳар ҳокими Жаҳонгир Ортиқхўжаев япониялик бир гуруҳ тадбиркорлар билан учрашди. Бу ҳақда пойтахт ҳокимлиги хабар берди.

Қайд этилишича, учрашувда Япониянинг “DʼS Grace FE LLC” компанияси директори Дайсуке Накамура Тошкентда кунчиқар мамлакатнинг IT академияси иш бошлаганини билдириб, унда эҳтиёжманд оилалар фарзандлари бепул таълим олишлари мумкинлигини айтиб ўтган. 

«Япониянинг Beeanz корпорацияси ҳам худди шу йўналишда фаолият олиб боради, ҳозиргача улар Зарафшон шаҳри ва Янгийўл туманида IT мактабларни ишга туширдилар. Корпорациянинг мақсади Тошкентда ҳам шундай мактабларни кўпайтиришдир. Тошкент шаҳар ҳокими бу таклифларни қўллаб-қувватлаб, ёш авлоднинг замонавий технологиялар асосидаги таълими учун пойтахтда зарур шароитларни яратишга тайёрлигини айтди.

Noritsuisu компанияси мутасаддилари эса тадбиркорлар ўртасидаги алоқаларни кенгайтириш, Япониянинг Ёш тадбиркорлар палатаси билан ҳамкорликда форум ташкил қилиш муҳимлигини таъкидлади. Шу билан бирга офис стулларини ишлаб чиқариш компаниянинг асосий йўналишларидан бири эканлигини қайд этиб, Тошкентда мазкур йўналишда қўшма корхонани очиш, хавфсизлик соҳасида аҳамиятли бўлган ID карталарни ишлаб чиқаришни йўлга қўйиш таклифини билдирди», дейилади хабарда.

Шунингдек, учрашувда косметика ва медиа йўналишдаги тадбиркорлар ҳам иштирок этиб, ўз йўналиши бўйича биргаликда ишлаш юзасидан таклифларни айтиб ўтган.