Фото: Reuters

Айни кунларда Европада бўлиб турган «Толибон» ҳаракатининг илк расмий делегацияси Афғонистон фуқаролик жамияти вакиллари билан музокаралар ўтказди. 

Норвегия пойтахти Ослога 22 январь куни кечқурун Афғонистон муваққат ҳукуматининг ташқи ишлар вазири этиб тайинланган Амир Хон Мўъттаки бошчилигидаги делегация етиб келган эди. Маслаҳатлашувлар 25 январга қадар давом этади. Бу «Толибон» ва Ғарб давлатлари ўртасидаги илк расмий музокаралар ҳисобланади.

Музокараларнинг биринчи кунида «Толибон» фаол афғон аёллари ва журналистлар билан учрашди. Норвегия воситачилигидаги музокаралар ёпиқ эшиклар ортида ўтди.

Яқин икки кун ичида ҳаракат вакиллари Ғарб дипломатлари билан учрашиши кутилмоқда. Хусусан, бугун АҚШ, Франция, Буюк Британия, Германия, Италия ва Европа Иттифоқи вакиллари, сешанба куни эса Норвегия расмийлари билан икки томонлама музокаралар бўлиб ўтади.

2021 йилнинг август ойида АФғонистонда ҳокимиятни қўлга олган «Толибон» хотин-қизларга нисбатан бир қатор чекловлар ўрнатди. Жумладан, қизларнинг мактабга боришини чекланди, аёл телебошловчилардан ҳижоб ўрашни талаб қилинди, маҳаллий телеканалларга аёллар иштирокидаги фильмларни намойиш этиш, шунингдек, шифокорга эркаклар ҳамроҳлигисиз келган аёлларни даволаш таъқиқланди.