Токио Олимпиадасини Лондонга кўчириш таклиф этилди
Фото: sportsdaily.ru
Лондон мэри бўлиш учун курашаётган Шон Бэйли Токио-2020 Олимпиадасини Лондонга кўчириш имкониятларини кўриб чиқиш керак, деган таклифни илгари сурди.
Бэйлининг айтишича, агарда коронавирус тарқалиши тўхтамаса, Буюк Британия пойтахтида Олимпиададек улкан тадбирни ўтказиш учун тажриба ҳам, инфратузилма ҳам етарли.
Ўз навбатида, Токио губернатори Юрико Коикэ таклифни кескин танқид қилди.
“Ушбу муаммодан мэрликни эгаллаш манфаатлари йўлида фойдаланишга уриниш ноўрин. Бу муаммо бутун дунё эътиборини тортиши сайёҳлик лайнери (“Diamond Princess”) билан боғлиқ. Бироқ айни шу кема Буюк Британияга тегишли. Умид қиламанки, мана шу жиҳатлар ҳам эътиборга олинади”, — деди Токио губернатори.
Бунгача Токио олимпиадаси ташкилотчилари ҳам коронавирус туфайли жиддий ўзгаришларга қўл уришга ҳали анча эрта эканини таъкидлашганди. Халқаро олимпия қўмитаси ҳам ўйинларнинг ўтказилиш жойини кўчириш, бекор қилиш ёки ўзгартиришга зарурат йўқлигини таъкидлаганди.
Эслатиб ўтамиз, Японияда коронавирусдан касалланганларнинг умумий сони 700 нафардан ошган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг