Ўзбекистон Гидрометеорология хизмати агентлиги 2025 йил 8-12 феврал кунлари кутилаётган ёғингарчилик ва ҳаво ҳароратининг ўзгариши сабабли республиканинг тоғли ҳудудларида қор кўчиш хавфи юзага келишини маълум қилди.

Тошкент вилоятининг Бўстонлиқ, Оҳангарон ва Паркент туманларидаги Чотқол тизмаси тоғларида ҳамда Наманган вилоятининг Поп тумани ҳудудларида қор кўчиши эҳтимоли юқори баҳоланмоқда.

Мутахассисларнинг таъкидлашича, ушбу ҳудудларда қор қатлами етарлича қалин бўлиб, ёғингарчилик натижасида юмшаши ва тоғ ён бағирларида сирпаниш жараёнларини кучайтириши мумкин.

Қор кўчиш хавфи эълон қилинган ҳудудларда яшовчи аҳоли, сайёҳлар ва автомобил ҳайдовчиларидан эҳтиёт чораларини кўриш сўралади. Тоғли ҳудудларга саёҳат қилишни режалаштирган фуқаролар, алпинистлар ва дам олувчиларга белгиланган хавфсизлик қоидаларига риоя қилиш, зарурат бўлмаса, тоғли ҳудудларга бормаслик тавсия этилади.

Шунингдек, йўл ҳаракати қатнашчилари ҳам эҳтиёткорликни ошириши, қор кўчиши хавфи мавжуд бўлган йўлларда ҳаракатланишдан тийилиши лозим.

Гидрометеорология хизмати агентлиги ва бошқа масъул ташкилотлар томонидан ушбу хавфнинг олдини олиш ва зарур чораларни кўриш бўйича тегишли ишлар олиб борилмоқда. Об-ҳаво шароити бўйича қўшимча маълумотлар мунтазам эълон қилиниши мумкин.