Солиқ юкини изчиллик билан камайтириш, солиқ солиш тизимининг тартиб-таомилларини соддалаштириш, шунингдек, солиқ маъмуриятчилигини такомиллаштириш иқтисодиётни жадал ривожлантириш ҳамда мамлакатнинг инвестициявий жозибадорлигини яхшилашнинг энг муҳим шартларидан ҳисобланади.

Худди шу мақсад билан, “Солиқ ва бюджет сиёсатининг 2024 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги Ўзбекистон Республикасининг 891-сонли Қонунига асосан, Солиқ кодексига айрим ўзгартиришлар киритилди.

Айни кунларда ушбу Қонунга асосан, Солиқ кодексининг 46 та моддасига киритилган ўзгартириш ва қўшимчалар мазмун-моҳиятини солиқ тўловчиларга етказиш учун жойларда тарғибот-ташвиқот ишлари олиб борилмоқда. Хусусан, пойтахтимизнинг Олмазор туманида Солиқ қўмитаси ҳамда Тошкент шаҳар солиқ бошқармаси масъуллари ва мутахассислари томонидан жорий йилнинг 18 январь куни 2024 йилдан солиқ сиёсатига киритилган янгиликлар юзасидан 100 нафарга яқин тадбиркорларга маълумот берилди.

2024 йилнинг 1 январидан бошлаб кучга кирган мазкур Қонунда жорий йил учун солиқ сиёсатининг асосий йўналишлари белгиланиб, бунда Президентимизнинг тадбиркорлар билан очиқ мулоқоти доирасида бизнес юритишни соддалаштириш, солиқ юкини камайтириш юзасидан белгилаб берилган топшириқлари, хусусан, ўзини ўзи банд қилган шахсларга солиқ солиш тартибини такомиллаштириш, қўшилган қиймат солиғи занжирининг узлуксизлигини таъминлаш, табиий бойликлардан самарали ва оқилона фойдаланиш каби жиҳатлар назарда тутилмоқда.

Семинарда, энг аввало, ишбилармонларни қўллаб-қувватлаш учун фойда солиғи бўйича ҳар ой бўнак тўловлари тўлаши лозим бўлган тадбиркорлар даромадининг чегаравий миқдори аввал 5 млрд. сўм бўлган бўлса, эндиликда 10 млрд. сўм этиб белгиланганлиги таъкидланди.

Қўшилган қиймат солиғини қоплашда ўтказиладиган камерал солиқ текширувидан ташқари, камерал солиқ текширувларида солиқ тўловчининг ҳудудига кириш, ҳудудини кўздан кечириш, ҳужжатларни талаб қилиш ва уни чақиртириш, ҳужжатлари ва буюмларини олиб қўйиш тақиқлангани, шунингдек, Юридик шахслар ва ЯТТларга камерал солиқ текшируви натижасида қўшимча ҳисобланган солиқларни 6 ой мобайнида тенг улушларда бўлиб-бўлиб тўлаш ҳуқуқи берилганлиги бўйича батафсил тушунчалар берилди.

Шуни алоҳида таъкидлаш жоизки, Солиқ мажбурияти бўйича даъво қилиш муддати 5 йилдан 3 йилга қисқартирилганлиги барча учун бирдай яхши янгилик бўлди.

Озиқ-овқат ва ноозиқ-овқат товарлари билан савдо қилувчи якка тартибдаги тадбиркорлар учун қатъий белгиланган жисмоний шахслардан олинадиган даромад солиғи ставкалари ўзгаргани ҳам ҳудудлар кесимида маълум қилинди.

Яна бир аҳамиятга молик жиҳат шундаки, ота-оналарга фарзандининг таълим олишига контракт учун тўлаган тўловларига нисбатан қўлланиладиган имтиёз фарзандининг ёши 26 ёшдан ошган тақдирда ҳам қўлланилиши белгиланди.

Семинар якунида иштирокчилар томонидан йўлланган саволларга мутахассислар томонидан атрофлича жавоблар берилиб, Солиқ кодексига киритилган ўзгаришлар акс этган махсус қўлланмалар тарқатилди.

Хулоса қилиб айтганда, қонунчиликдаги бундай ўзгаришлар бизнес муҳитини яхшилаб, тадбиркорликка янада кенг йўл бериш, уларнинг эркин ва самарали фаолият юритишларини таъминлашга қаратилганлиги билан аҳамиятли бўлди.