«Иссиқлик электр станциялари» акциядорлик жамияти тизимида қайта тикланувчи энергия манбаларини босқичма-босқич жорий этиш орқали ишлаб чиқариш самарадорлигини ошириш ҳамда энергия тежамкор технологиялардан кенг фойдаланиш борасида ижобий ишлар амалга оширилмоқда.

Хусусан, "Сирдарё ИЭС" корхонасида қуввати 1200-1500 кВт бўлган қуёш фотоэлектр станциясини қуриш бўйича дастлабки ишлар бошланди. Мазкур станция ишга туширилгач, йилига 3 млн. кВт.соат электр энергияси ишлаб чиқарилади ҳамда 900 минг кубметр табиий газ тежалади.

Икки гектар майдонни эгаллайдиган ҳамда қуввати 1200-1500 кВт бўлган мазкур қуёш станциясини тайёр ҳолда қуриб, ишга тушириш («под ключ») мақсадида «Ўзбекэнерготаъмир» АЖ билан шартнома тузилган бўлиб, унга кўра, қурилиш учун ажратилган ер майдонини тайёрлаш, қурилиш-монтаж ва созлаш ишларини бажариш кўзда тутилган.

Ҳозирги кунда бир гуруҳ мутахассислар томонидан ер майдонини ўрганиш ҳамда объектни лойиҳалаш ишлари бошлаб юборилди.

Жорий йилнинг октябрь ойи бошида «Ўзбекэнерготаъмир» АЖ томонидан қуёш панеллари метал конструкциялари ўрнатиш учун олиб келинди.

— Ушбу ишлардан кўзланган асосий мақсад тизимда энергия самарадорликка эришиш, ёқилғи-энергетика ресурсларини тежаш ва қайта тикланувчи энергия манбаларини ривожлантириш орқали маҳсулот таннархини янада пасайтиришга эришишдир, — дейди «Сирдарё ИЭС» Техник ишлаб чиқариш бўлими бошлиғи Ғулом Холназаров.