Сингапур Республикаси Президентининг Ўзбекистон Республикасига Олий даражадаги ташрифи доирасида Сингапур Республикаси билан маданий алоқаларни мустаҳкамлаш ҳамда ушбу давлатдан сайёҳлар сонини ошириш мақсадида Маданият ва туризм вазирлиги томонидан Сингапурнинг сайёҳлик агентликлари миллий ассоциацияси (NATAS) бошчилигида Сингапурнинг етакчи сайёҳлик компаниялари ҳамда оммавий ахборот воситалари вакиллари учун инфо-тур ташкил этилган эди.

Бундан ташқари 24 май куни Тошкент шаҳрида Маданият ва туризм вазирлиги ташаббуси билан Ўзбекистон-Сингапур туризм йўналиши тадбиркорлари ўртасида ўтказилган очиқ мулоқотда ҳам цингапурлик туроператорлар ва ОАВ вакилларидан иборат делегацияси иштирок этган эди.

Сингапурнинг энг йирик босма нашрларидан бири “The Straits Times” газетасида Ўзбекистон туристик салоҳиятига оид мақолалар чоп этилди.

Маълумот учун, “SPH Media” компаниясига тегишли бўлган “The Straits Times” Сингапурнинг асосий инглиз тилидаги кундалик газетаси, Осиёдаги етакчи медиа компаниялардан бири. 1845 йил 15 июлда ташкил этилган газета мамлакат ва дунёнинг асосий янгиликларини ҳар томонлама ёритиб боради. Кундалик тиражи бир миллион нусхани ташкил қилади.

Мақолада Ўзбекистон улкан сайёҳлик салоҳиятига эга эканлиги, туризм инфратузилмаси юксак даражада ривожлангани қайд этилган. Мамлакатнинг туризм соҳаси жадал ривожланаётгани, бу анъанавий ўзбек меҳмондўстлиги ва бой тарихий-маданий мероси билан бир қаторда Ўзбекистонни тобора жозибадор ва нисбатан арзон сайёҳлик масканига айлантирилаётгани таъкидланган.

Эслатиб ўтамиз, жорий йилнинг ноябрь ойида Марказий Осиёда биринчи марта Ўзбекистонда Бутунжаҳон санитар-гигиеник шаҳобчалар саммитини ўтказиш режалаштирилмоқда.