Вобкент туманидаги “Ҳажувон” маҳалла фуқаролар йиғини ҳудудида айни пайтда тадбиркорлар ташаббуси билан ташкил этилган 20 дан ортиқ корхона фаолият кўрсатмоқда. Улар орасида “Best basheliy indust entry” хусусий корхонаси алоҳида ажралиб туради.

Хитойлик инвестор Шей Ху сармояси асосида барпо этилган мазкур тадбиркорлик субъекти техник тузни қайта ишлашга ихтисослашган. Бундай маҳсулотга ички бозорда талаб катта. У қадоқланган ҳолда буюртмачиларга етказилмоқда. Корхонада 12 кишининг бандлиги таъминланган. Кунига 30 тоннагача хомашёни қайта ишлаш имконияти мавжуд.

Эътиборлиси, корхонанинг мўъжазгина кўнгилочар маскани бор. У сармоядор Шей Ху томонидан барпо қилинган.

— Болалигимдан наботот оламига, хусусан, қушларга меҳр қўйганман, — дейди у. — Тақдир экан, бир неча йилдирки, Бухорода тадбиркорлик фаолияти билан шуғулланяпман. Юртингиз одамлари меҳр-оқибатли, табиати эса мафтункор. Шу боисдан менда кичик бўлсада қушлар бурчаги ташкил этиш фикри туғилди. Негаки, табиатнинг бу нозик, ҳуркак жонзотларини кўрган киши чарчоқни унутади. Бир олам завқу шавқ олади.

Корхонанинг кўнгилочар масканида товус, ўндан зиёд турдаги кабутарлар бор. Шей Хунинг таъкидлашича, улар орасида наслининг келиб чиқиш тарихи асрларга бориб тақаладиган, ноёб хат ташувчи кабутарларни ҳам кўришингиз мумкин.

Юртимизда саноат корхоналари йил, ой сайин кўпаймоқда. Қанийди, уларда ҳам кишини она-табиатимиз гўзаллиги, тароватидан баҳраманд қилиб, наботот оламини асраб-авайлашга даъват этувчи шундай жажжи масканлар яратилса...

Шуҳрат ШАРИПОВ,

Вобкент тумани ҳокимлиги матбуот хизмати раҳбари.