Шавкат Мирзиёев Нурсултон Назарбоевга сиҳат-саломатлик тилаб мактуб йўллади
Ўзбекистон Президенти Шавкат Мирзиёев Қозоғистоннинг Биринчи Президенти - Элбоши Нурсултон Назарбоевга мактуб йўллади.
Унда шундай дейилади:
““Муҳтарам Нурсултон Абишевич!
Сизнинг коронавирус касаллигига чалинганингиз тўғрисидаги хабарни чуқур безовталик ва катта хавотир билан қабул қилдим.
Ҳаётингиздаги ушбу синовли ва мураккаб пайтларда биз учун ҳамиша чексиз эҳтиромга сазовор бўлиб келган Сиз, азиз оғамни ҳар томонлама қўллаб-қувватлашга тайёрлигимни ва яқин кўмакдош эканлигимни яна бир бор чин қалбдан маълум этмоқчиман.
Ҳеч шубҳасиз, қисқа фурсатларда мазкур вирусни муваффақиятли енгиб ўтиб, шифо топишингизга ва тузалиб кетишингизга ишончим комилдир.
Қадрли Нурсултон Абишевич, Сизга, Қодир Аллоҳдан мустаҳкам сиҳат-саломатлик, куч-қувват, узоқ умр ва янги зафарлар ато қилишини сўраб қоламан.
Тез орада Сиз билан дийдор кўришиш бахтига муяссарлик насиб этишига умид қиламан”.
Эслатиб ўтамиз, 18 июнь куни Қозоғистоннинг биринчи президенти Нурсултон Назарбоевда коронавирус инфекцияси аниқлангани ҳақида хабар берилди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг