Самарқандда «Газдан суюқликка» (gas-to-liquids, GTL) технологияси бўйича биринчи халқаро конференция ўтказилмоқда.

Анжуман «Ўзбекнефтгаз» АЖ ва унинг шўба корхонаси GTL синтетик суюқ ёқилғи ишлаб чиқариш бўйича жаҳонда бешинчи ўринни эгаллаган «Uzbekistan GTL» томонидан ташкил этилди.

Конференцияда GTL ускуналаридан фойдаланадиган компаниялардан 65 дан ортиқ муҳандис ва техник ходимлар иштирок этмоқда.

Конференция Жанубий Африканинг «Sasol» ва Даниянинг «Haldor Topsoe» компаниялари томонидан ишлаб чиқилган ва ҳозирда Ўзбекистонда қўлланилаётган жаҳон даражасидаги GTL технологияларига бағишланган.

Ушбу ноёб қайта ишлаш жараёнлари табиий газни бензин, дизел ва керосин каби суюқ ёқилғига айлантира олади. GTL технологияси табиий газ ресурсларига эга мамлакатларга одатда хом нефтдан қайта ишланадиган қимматбаҳо суюқ ёқилғиларни ишлаб чиқариш имконини беради.

Халқаро энергетика агентлиги маълумотларига кўра, Ўзбекистон йилига 60 миллиард куб метрга яқин табиий газ қазиб олиш билан дунёда энг йирик газ ишлаб чиқарувчилардан бири ҳисобланади.

Самарқанд конференция синтетик суюқ ёқилғи ишлаб чиқарувчи етакчи компаниялар ўртасидаги ҳамкорликни чуқурлаштиришга хизмат қилди. Уч кун давомида GTL ускуналаридан фойдаланувчи муҳандис ва техник ходимлар ўз тажрибалари билан ўртоқлашдилар, кейинг ривожланиш истиқболларини режалаштирдилар ва GTL технологиясидаги потенциал янгиликларни, хусусан, самарадорликни оширадиган янгиликларни муҳокама қилмоқда.

Анжуман давомида жаҳондаги етакчи GTL заводлари, жумладан «Uzbekistan GTL», «Oryx GTL», «Escravos GTL» ва «Topsoe SynCOR» бўйича техник тадқиқотлар тақдим этилди.

— Мен ушбу форумни нефть ва газ саноати учун муҳим воқеа деб айта оламан, — деди «Uzbekistan GTL» бош директори Фахритдин Абдурасулов. — Биз табиий газдан синтетик суюқ ёқилғи ишлаб чиқаришга ихтисослашган қатор мутахассисларни бир майдонга жамлаганимиздан фахрланамиз. Конференция фикр алмашиш учун ажойиб платформага айланиб, бу соҳада янги технологияларни ишлаб чиқиш ва жорий этишга олиб келиши мумкин. Шу ўринда таъкидлаш кераки, Ўзбекистон жаҳон энергетика саноатига ўзгартирувчи таъсир кўрсатиши мумкин бўлган GTL технологияларининг глобал марказига айланди.

Иштирокчилар, тадбир доирасида Қашқадарё вилоятида бунёд этилган «Uzbekistan GTL» заводига ҳам ташриф буюришди.

Конференция 23 май кунига қадар давом этади.