Фото: Reuters

Россияда армия бош штаб бошлиғи ўринбосари генерал-лейтенант Вадим Шамарин йирик миқдорда пора олишда гумонланиб ҳибсга олинди. Бу мамлакатда юқори мартабали ҳарбий амалдорларнинг бир ойда тўртинчи маротаба ҳибсга олиниши ҳисобланади.

«ТАСС» ахборот агентлиги хабарига кўра, Ҳарбий суд чоршанба куни Мудофаа вазирлигининг алоқа бош бошқармасига раҳбарлик қилган Шамаринни икки ойга қамоққа олиш ҳақида қарор чиқарган.

Бунгача Россиянинг Украинадаги махсус ҳарбий амалиётида қатнашган собиқ бош қўмондон генерал майор Иван Попов ва Мудофаа вазирлигининг кадрлар бошқармаси бошлиғи генерал-лейтенант Юрий Кузнецов порахўрликда айбланиб ҳибсга олинган эди.

Апрель ойида эса Мудофаа вазири ўринбосари, собиқ Мудофаа вазири Сергей Шойгунинг яқин сафдоши Тимур Иванов ҳам порахўрликда айбланиб ҳибсга олинганди. Бундан ташқари, Ивановнинг дўсти ва Мудофаа вазирлигига бўйсунувчи бир қанча компанияларнинг раҳбарлари ҳам қўлга олинган.

Президент Владимир Путин май ойида инаугурация маросимидан сўнг Шойгуни Мудофаа вазири лавозимидан бўшатиб, унинг ўрнига иқтисодчи Андрей Белоусовни тайинлади.

Шамариннинг бошлиғи генерал Валерий Герасимов Украинадаги урушда Россия ҳарбийларининг фаолияти юзасидан қаттиқ танқидларга учраган бўлса-да ҳеч қандай айбловларга учрамаган. Ўз навбатида, Кремль тизимда «тозалаш ишлари» олиб борилаётганини рад этди.

«Коррупцияга қарши кураш доимий ҳаракатдир. Бу кампания эмас, балки, ҳуқуқ-тартибот идоралари фаолиятининг ажралмас қисмидир», деди Кремль матбуот котиби Дмитрий Песков журналистларга.

Ҳибсга олишлар ва Мудофаа вазирлиги раҳбариятининг алмашиши Россия кучларининг 18 ой ичидаги энг муҳим ютуқлардан бири, яъни Харковдаги фаол жанглардан сўнг амалга оширилган.