Россияда бензин экспортига тақиқ жорий этилади
Россия Бош вазири ўринбосари Александр Новак Энергетика вазирлигига 2026 йил 1 апрелдан бошлаб бензин экспортини тақиқлаш тўғрисидаги қарор лойиҳасини тайёрлашни топширди. Бу ҳақда ТАСС хабар бермоқда.
— Йиғилиш якунларига кўра, Александр Новак Энергетика вазирлигига 2026 йил 1 апрелдан бензин экспортини тақиқлаш тўғрисидаги қарор лойиҳасини тайёрлаш бўйича кўрсатма берди, — дейилади хабарда.
Қайд этилишича, ушбу чора нархларни барқарорлаштириш ва ички бозорни ёқилғи билан устувор равишда таъминлашга қаратилган.
РФ Вазирлар Маҳкамасининг билдиришича, йиғилишда Президент Владимир Путин томонидан қўйилган вазифа — мамлакат ичида ёқилғи нархининг белгиланган прогнозлардан юқорилаб кетишига йўл қўймаслик масаласига алоҳида эътибор қаратилган.
ТАСС маълумотларига кўра, бензин экспортига қўйилган тақиқ 31 июлгача давом этади. У бозорнинг барча иштирокчиларига, яъни ёқилғи ишлаб чиқарувчиларга ҳам, ишлаб чиқарувчи бўлмаган (трейдер)ларга ҳам тааллуқли бўлади.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг