Фото: AP

Россия АҚШ президенти Жо Байден ва АҚШнинг бошқа бир қатор юқори мартабали амалдорларига қарши шахсий санкциялар киритди. Бу ҳақда Россия ташқи ишлар вазирлиги хабар бермоқда.

Улар орасида Давлат котиби Энтони Блинкен, Марказий разведка бошқармаси директори Уилям Бернс, Оқ уй матбуот котиби Жен Псаки, Халқаро тараққиёт агентлиги раҳбари Саманта Пауэр, Мудофаа вазири Ллойд Остин бор. Шунингдек, Байденнинг ўғли Хантер Байден ҳам киритилган.

Хабардан келиб чиққан ҳолда, гап Россияга киришни тақиқлаш ҳақида кетмоқда.

«Бу қарши реакция сифатида ва Россиянинг юқори мартабали амалдорларининг АҚШга киришини тақиқловчи бир қатор мисли кўрилмаган санкцияларга жавоб сифатида қабул қилинган», дейилади манбада.

25 февраль куни АҚШ Россиянинг Украинага бошлаган «махсус ҳарбий операция» ортидан Россия президенти Владимир Путин, ташқи ишлар вазири Сергей Лавров ва бошқа юқори мартабали амалдорларга нисбатан санкциялар қўллаган эди. Санкциялар активларни музлатиш билан бирга, Оқ уйга кўра, ушбу рўйхатга киритилган шахсларнинг Қўшма Штатларга киришини ҳам тақиқланишини ҳам англатади.