Россия ТИВ раҳбари Путин ва Байден учрашувига тайёргарлик кўрилаётгани ҳақида маълум қилди
Москва Россия президенти Владимир Путин ва АҚШ раҳбари Жо Байденнинг учрашуви устида ишламоқда. Бу ҳақда Россия ташқи ишлар вазири Сергей Лавров «Аргументы и Факты» газетасига берган интервьюсида маълум қилди.
Лавров Россия ва АҚШ ўртасидаги мулоқот глобал хавфсизликни таъминлаш ва халқаро даражадаги турли таҳдидларга қарши туриш учун зарурлигини эслатди. «Буларнинг барчасини англаган ҳолда, биз Вашингтоннинг президентлар учрашувини шу йил ёзда Европа мамлакатларидан бирида ўтказиш тўғрисида таклифини инобатга олдик», дейди вазир.
Шунингдек, Лавров яқинда Рейкявикда АҚШ давлат котиби Энтони Блинкен билан бўлган учрашув ҳақида тўхталиб ўтди. Унга кўра, Вашингтоннинг бу конструктив ёндашуви Москвани руҳлантирган.
17 май куни Путин ва Байденнинг учрашиши мумкин бўлган жой маълум бўлгани ҳақида хабарлар тарқалди. Россия давлат идораларидаги манбанинг таъкидлашича, икки давлат раҳбарларининг саммити Швейцарияда ўтказилиши мумкин.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг