Вазирлар Маҳкамасининг жорий йил 6 июндаги “Рангли ва қора металлар парчалари, чиқиндилари билан ишлаш тартибини такомиллаштириш чора-тадбирлари тўғрисида”ги қарорига мувофиқ, рангли ва қора металл парчалари, чиқиндилари билан ишлаш тартиби тасдиқланди.

Унга кўра, эндиликда жисмоний шахслардан рангли метал парчалари ва чиқиндиларини фақат “Ўзиккиламчиранглиметалл” акциядорлик жамияти томонидан қабул қилинади. Бунинг учун жамият томонидан икки ой муддатда Қорақалпоғистон Республикаси, вилоятлар ва Тошкент шаҳрида, шунингдек, туманлар марказларида махсус қабул пунктлари ташкил этилади.

Айтиш жоизки, ҳужжатда жисмоний шахслардан 84 турдаги рангли металл парчалари қабул қилишга рухсат этилган. Электр техникаси, саноат, ҳарбий аҳамиятга эга бўлган қора ва рангли металл парча ва чиқиндилари, шунингдек, темир йўл, ҳаракатдаги таркиблар ва авиация транспорти қисмларини сотиб олиш тақиқланади.

Эътиборлиси, тўлов бозор асосида аниқланадиган эркин нархларда нақд шаклда амалга оширилади. 16 ёшга тўлмаган шахслардан эса металл парчаларини қабул қилишга йўл қўйилмайди.