Фото: “Халқ сўзи”

Шу кунларда республикамизда электр энергияси билан боғлиқ муаммоларни бартараф этишда таъминотнинг муқобил туридан фойдаланишга катта эътибор қаратилмоқда. Жумладан, қуёш панелларини ўрнатиш орқали электр энергияси билан боғлик юзага келган ўткир муаммоларга барҳам бериш мумкин.

— Институтимизда анъанавий электр энергиясидан фойдаланишда бир йиллик сарф-харажатимиз 500 миллион сўмни ташкил этаётганди,—дейди Андижон давлат чет тиллари институти ректори Дилшодбек Рустамов. –Жорий йилнинг бошида 240 киловатт/соат муқобил энергия ишлаб чиқарувчи қуёш панелларини ўрнатдик. Бунинг натижасида йил якунига қадар 300 миллион сўм маблағ тежашни режалаштирганмиз. Қолаверса, институт ходимлари орасида ихтиёрий равишда “Қуёшли хонадон” лойиҳаси ишга туширилган бўлиб, унда ҳар бир оила хонадонига 3 киловатт/соатдан 5 киловатт/соатгача қувватга эга бўлган қуёш панеллари ўрнатилди. Афзаллик жиҳатлари мақтаса арзигулик: узлуксиз таъминот, хавфсиз ҳаракат, экологик хатарсиз ва ойига 150-200 минг сўм соф даромад. Зеро, истеъмолдан ортган ҳар киловват энергияни 1000 сўмдан сотиш имкони мавжуд.

Шу ўринда айтиш жоиз, бу йил Андижон вилоятида 7460 та объектга қуёш панеллари ўрнатилиши режалаштирилган бўлиб, ҳозиргача 5981 та объект 19 минг 800 киловатт қувватга эга панелларга эга бўлди. Албатта, бу омиллар яқинлашиб келаётган куз-қиш мавсумида электр энергияси таъминотидаги узилишларнинг олдини олишда қўл келади.

Саминжон ҲУСАНОВ, “Халқ сўзи”.