Қуръон китобини ёқиб эътирозларга сабаб бўлган шахс ижтимоий тармоқдаги жонли эфири вақтида отиб кетилди
29 январь куни тунда Швециянинг Сёдертелье шаҳри полициясига ҳудуддаги хонадонлардан бирида ўқ узилганлиги юзасидан фавқулодда қўнғироқ келиб тушган. Бу ҳақида «Blue News» нашри хабар берди.
Унга кўра, полиция ходимлари зудлик билан воқеа жойига этиб боришган ҳамда кўп қаватли бино хонадонларининг биридан 38 ёшли эркакнинг жасадини топишган.
Дастлабки тергов маълумотларига кўра, ўлдирилган шахс мунтазам Қуръон китобини ёқиш билан шуғулланган Салван Момика эканлиги ойдинлашди. Қотиллик Момиканинг ижтимоий тармоқда жонли эфир қилаётган вақтида содир этилганлиги таъкидланмоқда.
Маълумотларга кўра, Салван Момика Ироқда туғилган бўлиб, 2017 йилда ватанидан Германияга қочиб келади. У 2018 йилда Швецияга кўчиб келиб, ўзини атеист деб эълон қилган. Шундан сўнг, Момика полиция ҳимоясида исломга қарши мунтазам намойишлар уюштириб, кенг жамоатчиликнинг эътирозларига сабаб бўлиб келаётган эди.
Салван Момикани мамлакатдан депортация қилиш ироқликларнинг унга нисбатан нафрати ҳамда ўлим таҳдидлари туфайли бир неча бор бекор қилинганди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг