Қатар Соғлиқни сақлаш вазирлигининг маълум қилишича, мамлакатда 7 июль ҳолатига кўра коронавирусни юқтириб олганлар сони 100 мингдан ошди.

2,75 миллионта одам яшайдиган Қатарда ҳозиргача 101 345 кишига CОВИД-19 ташхиси қўйилди. Бу мамлакат аҳолисининг 3.65 фоизи коронавирусга чалинганини англатади. Қатар мазкур кўрсаткич бўйича дунёда олдинги ўринни эгаллаб турибди. Аммо Қатарда ўлимлар сони бошқа мамлакатларга қараганда анча кам бўлиб, шу пайтгача атиги 138 киши мазкур вирус туфайли вафот этган, холос.

Қатарда касалланганларнинг қарийб 96 мингдан ортиқ бемор тузалган. Иқтисодий жиҳатдан «бақувват» бўлган Қатарда шу пайтгача аҳолининг 14 фоизи - 368 111 киши коронавирусга тест топширган.

«Қатарда коронавирусни енгиш учун амалга оширилган чоралар ўз самарасини берди. Натижада, ушбу касалликнинг бирданига авж олиб кетиши ва касалланишларнинг сони ошиб кетишининг олди олинди» дейди Соғлиқни сақлаш вазирлиги.

Қатарда сўнгги ҳафталарда коронавирус билан боғлиқ янги ҳолатларнинг кунлик миқдори камайиб бормоқда. Ўтган ҳафта давомида бир кунда ўртача 748 кишининг коронавирусга чалингани аниқланган бўлса, ундан олдинги ҳафтада бу рақам 958 кишини ташкил қилаётган эди. Шунинг учун ҳукумат бир қанча иқтисодий фаолият турларига рухсат беришда давом этмоқда. Жумладан, 1 июлдан бошлаб соҳиллар очилди.