Маълумки, деҳқончиликда ҳудуднинг об-ҳаво, тупроқ, сув шароитлари билан бир қаторда, уруғнинг сифати ҳам муҳим аҳамият касб этади. Айниқса, пахта етиштиришда ҳосилдорлик кўп жиҳатдан танланган уруғликнинг сифатига боғлиқ бўлади.

Жорий йилда 133 минг 200 гектар майдонда ғўза парваришлаб, юқори ҳосил олишни мақсад қилган қашқадарёлик миришкорлар ҳам мавсум тадоригини сара уруғлик тайёрлашдан бошлашган.

— Вилоятда бу йилги мавсум учун 5873 тоннадан ошиқ уруғлик чигит ғамланган, — дейди “Ўзагроинспекция”нинг Қашқадарё вилоят бошқармаси шўба бошлиғи Ҳабибулло Эсанов. — Асосан, ғўзанинг ҳудуд иқлим шароитига мос, эртапишар “Бухоро-102”, “Порлоқ-4”, “Бухоро-10”, “Равнақ-2” ҳамда “С-8290” навлари экилиши мўлжалланган. Айни пайтда ушбу навлардаги уруғлик чигитларни саралаш, туксизлантириш ҳамда касаллик ва зараркунандаларга қарши дорилаш ишлари амалга оширилмоқда. Инспекциямиз ходимлари томонидан вилоятдаги барча уруғлик чигит тайёрлаш цехларидаги иш жараёнлари кузатилиб, уруғликка белгиланган талаблар асосида ишлов берилиши назоратга олинган.

Албатта, бу борадаги тадбирларнинг ўз вақтида ва сифатли бажарилиши жорий йилда вилоят миришкорлари томонидан пахтадан юқори ҳосил олинишига замин яратади.

Жаҳонгир БОЙМУРОДОВ, “Халқ сўзи”.