Қарши шаҳридаги хароб аҳволда бўлган 2-сонли ётоқхона кадрларидан сўнг шаҳар ҳокими мазкур бинода ҳомийлик маблағлари ҳисобидан таъмирлаш ишларини олиб боришга кўрсатма берди. Бу ҳақда UzNews хабар берди.

Атиги 5 кунлик иш давомида 100 га яқин ходимлар 1970 йилда қурилган ётоқхона биносини тубдан ўзгартириб, қўшни ҳудудни ободонлаштиришди.

Қарши шаҳар ҳокими ўринбосари Ғайрат Султонов берган маълумотга кўра, бинонинг ҳар бир қаватида ошхона жиҳозлари, газ, ҳожатхоналар ташкил этилиб, сув таъминоти тикланади. Бундан ташқари, бугунги кунда 150 нафарга яқин аҳоли истиқомат қилаётган ётоқхона ҳудудида кенг болалар майдончаси қурилиб, ўриндиқлар, чиқинди қутилари ўрнатилади.

Кейинчалик нима қилиш кераклиги масаласи ҳал қилинмоқда. Катта эҳтимол билан, янги бино қурилади ва ётоқхонада рўйхатдан ўтган ва ўз уйига эга бўлмаган ижарачилар у ерга кўчиб ўтадилар. Тадбиркор билан барча ижарачилар ётоқхонадан чиқиб кетганидан кейин бино унга қайтарилиши ҳақида келишувга эришилди, – дейди Ғайрат Султонов.

Бу ердаги ободонлаштириш ишларини 20 декабрга қадар якунлаш режалаштирилган.