Канаданинг Соғлиқни сақлаш агентлиги ва Манитоба университети олимлари пахтадан тайёрланган кийимлар ҳамда ниқоблар коронавируснинг инсон териси ва шиллиқ пардаларига тарқалишининг олдини олишини аниқлашди.

Бу ҳақда “medRxiv” порталида ҳали клиник синовлардан ўтиши керак бўлган тиббий кўрсатмалар келтирилган тадқиқот хулосаларида айтилди.

Нима учун пахта коронавирусдан яхшироқ ҳимоя қила олади?

Олимлар қанчалар чидамли эканлигини текшириш мақсадида SARS-CоV-2 вирусини шахсий ҳимоя воситалари учун ишлатиладиган тиббий кўрик ўтказишда қўлланадиган нитрил қўлқоплар, кимёвий моддаларга чидамли қўлқоплар, N-95 ва N-100 респиратор ниқоблари, Tyvek (енгил ва пишиқ мато), пластик ва зангламайдиган пўлат ҳамда пахта каби саккиз хил матога жойлаштиришди ва 21 кун давомида кузатишди.

Натижада 100 фоиз пахта матосига қўлланганда, коронавирус бир кундан камроқ вақт ичида йўқ бўлиб кетгани, бошқа материалларда эса уч ҳафтагача сақланиб қолганини аниқлаган тадқиқотчилар тўпланган маълумотлар «тасдиқланган коронавирус ҳолатларнинг юқори фоизини» ташкил этувчи тиббиёт ходимлари учун ҳимоя воситаларини ишлаб чиқишга ёрдам бериши мумкин, деган хулосага келишган.

Уларнинг фикрига кўра, пахта матосидан тикилган ниқобларидан фойдаланиш фойдали ва хавфсиздир.

«Пахтанинг ўзига хос хусусияти юқори гигроскопиклиги бўлиб, секин қурийди. Коронавирус эса барчага маълумки, намликдан қўрқади», дейди А. Н. Косигина номидаги Россия давлат университетининг декоратив-амалий санъат ва бадиий тўқимачилик кафедраси мудири Ирина Рибаулина.

Қозон Федерал университетининг фундаментал тиббиёт ва биология институти генетика кафедраси профессори Алберт Ризвановнинг изоҳлашича, маълум бир материалда вирусни ўз ичига олган томчиларнинг қанчалик тез қуриши унинг енгиллиги, атроф-муҳит таъсири, масалан, қуёш нурига қанчалик чидамлилиги билан боғлиқ.

Мутахассиснинг фикрига кўра, материалнинг ўз сиртида вирусни қанча вақт ушлаб туриши муҳим эмас, асосийси, у ишлатишда гигиена қоидаларига жавоб бериши, стерилизация ва автоклав (асбоблар ва бошқа материалларга юқори буғ билан ишлов бериш) учун қулай бўлиши лозим.