Видеодан кадр

Фавқулодда вазиятлар вазирлиги қутқарувчилари «Қамчиқ» довонида юк автомобилида содир бўлган ёнғинни бартараф этди. Бу ҳақда вазирлик матбуот хизмати хабар берди.

Маълум қилинишича, бугун, 11 апрель куни соат 15:43 да А-373 автомобиль йўлининг «Қамчиқ» довонидан ўтган қисмида «Тошкент-Водий» йўналишида ҳаракатланган «Iveco» русумли юк автомобилида ёнғин юзага келганлиги тўғрисида «Қамчиқ» махсус қутқарув бошқармасига хабар келиб тушган.

Айтилган манзилга 2 та қутқарув бўлинмаси соат 15:53 да етиб бориб, 15:55 да ёнғинни ўраб олган ва аланга 16:00 да тўлиқ ўчирилган.

Ёнғин оқибатида юк автомобилининг салони тўлиқ ва тиркамаси қисман ёниб зарарланган. Тезкор ҳаракатлар натижасида ёнғиндан юк автомобили тиркамасининг тахминан 90 фоиз қисми сақлаб қолинган. Ҳодиса оқибатида тан жароҳати олганлар йўқ.

Шунингдек, бир гуруҳ фуқаролар ҳайдовчига транспорт воситаси тиркамасидаги юкни зудлик билан хавфсиз жойга туширишда ёрдам кўрсатган ва кўриладиган зарар миқдорини нисбатан кам бўлишига ҳисса қўшган.

ФВВга кўра, ҳозирда мазкур ёнғиннинг келиб чиқиш сабаби ва келтирилган зарар миқдори аниқланмоқда.