Ғазодаги ўт очишни тўхтатиш битимининг биринчи босқичида озод этилган 90 нафар фаластинликлар орасида журналист Рула Ҳассанеин ҳам бўлган. У Исроил қамоқхонасидаги ҳолатларни сўзлаб берган. Бу ҳақида «Al Jazeera» нашри хабар бермоқда.

Маълум бўлишича, журналист 2024 йилнинг март ойида Исроилнинг Ғазо ва Ғарбий Соҳилдаги ҳарбий тажовузлари ҳақида ёзган постлари учун Исроил ҳукумати томонидан ҳибсга олинган.

«Мени ҳибсга олишганда 9 ойлик қизим бор эди. Улар мени қизимдан айиришди. Салкам бир йил деганда уйга қайтиб келдим, қизим мени таний олмади. У бошқа аёлни ўз онаси деб ўйлаяпти», — дейди журналист ОАВга берган интервьюсида.

Шунингдек, 10 ойлик қамоқ давомида унинг олдига бирорта ҳам ташриф буюрувчиларга рухсат берилмаган.

«Ёнимга келувчиларни қайтариб юборишарди. Фақатгина бир марта 9 ойлик қизимнинг суратини кўришга рухсат беришди. Етти ойдан сўнг биринчи марта қизимнинг расмини кўриб, ҳайратга тушдим», — дейди у.

Рула Ҳассанеин «Al Jazeera» нашрига берган интервьюсида бошқа аёл маҳбуслар билан зич жойлашган камерада сақланганини, қамоқхонада инсоннинг бирламчи эҳтиёжларини қондириш учун етарли шароит йўқлигини маълум қилган.

«Энг оддий ҳуқуқларимиз ҳам поймол қилинди. Асосий эҳтиёжларимизни қондириш учун ҳам шароит йўқ. Етарли озиқ-овқат ва гигиена воситалари билан таъминланмадик», — деб қўшимча қилади журналист.

Эслатиб ўтамиз, 20 январь куни Ғазодаги ўт очишни тўхтатиш битимининг биринчи босқичида Исроил ҲАМАС томонидан озод қилинган уч киши эвазига 90 нафар фаластинлик маҳбусни озод қилган эди.