Украина президенти Владимир Зеленскийнинг маълум қилишича, мамлакат разведкаси Кремль АҚШ президенти Дональд Трампни 12 триллион долларлик йирик иқтисодий келишув орқали ўз томонига оғдиришга уринганини аниқлаган. Бу ҳақида BILD нашри хабар берди.

Зеленскийнинг фикрича, мазкур ташаббус Путиннинг иқтисодий ҳамкорлик бўйича махсус вакили Кирилл Дмитриев номи билан боғлиқ бўлиб, шартли равишда «Дмитриев пакети» деб аталган. Маълумотларга кўра, бу таклиф Дмитриевнинг Вашингтонга амалга оширган ташрифи чоғида илгари сурилган.

«Кўриниб турибдики, гап АҚШ ва Россия ўртасидаги кенг кўламли иқтисодий ҳамкорлик пакети ҳақида кетмоқда. Биз икки давлат ўртасида шунга ўхшаш икки томонлама ҳужжатлар имзоланиши мумкинлиги ҳақида эшитяпмиз», — дейди Украина раҳбари.

Зеленский бошқа тафсилотларга тўхталмаган, бироқ Вашингтон ва Москва ўртасида тузилиши мумкин бўлган келишувлар Украина суверенитети ва хавфсизлигига салбий таъсир кўрсатиши мумкинлигини қўшимча қилган.

«Аниқ айтамиз. Агар бундай келишувлар Украина иштирокисиз амалга оширилса, Киев уларни ҳеч қачон қўллаб-қувватламайди. Биз Москвага нисбатан санкцияларни кучайтириш керак деб ҳисоблаймиз», — деган Зеленский.

Иқтисодий таҳлилчиларнинг таъкидлашича, 12 триллион доллар маблағ Россиянинг йиллик ялпи ички маҳсулотидан қарийб тўрт баробарга кўпдир.