Архив сурат

«Миллий тикланиш» партиясидан президентликка номзод Алишер Қодиров мигрантлардан солиқ ундиришни таклиф қилди

У бу ҳақда куни Андижон шаҳрида сайловчилар билан учрашув вақтида айтиб ўтди.

«Мамлакат тараққиёти учун солиқларнинг ўрни жуда ҳам муҳим. Нима учун бизда бугун мигрантлар хорижга чиқиб, топган даромадидан солиқ тўламаслиги керак? Ўзбекистоннинг тараққиёти учун, келинглар, солиқ тўлайлик. Биз фақатгина ҳозир мигрантларнинг ишлаётган жойидан оиласига жўнатган пулини ҳисоб-китоб қилсак, шунча пул айланганини кўрамиз. Бу ҳам яхши, албатта. Пул келяпти.

Лекин бу сизнинг оилангизга жўнатилган пул, ундан солиқ тўланаётгани йўқ. У пул мамлакат тараққиёти учун ишлатилмаяпти. Шу сабабли мен таклиф қилган бўлардим: келинглар, янада ватанпарварроқ бўлайлик, мигрантлар ҳам ўз солиғини мамлакат тараққиёти учун тўласин», — деди учрашувда Алишер Қодиров.

Айтиб ўтиш керакки, президентликка номзод Алишер Қодировнинг бу таклифи ижтимоий тармоқларда кескин танқидга учради.

Бундан олдин Алишер Қодиров президентликка номзодлардан фақат Шавкат Мирзиёевни ўзига рақиб сифатида кўришини айтган эди.