Ҳиндистонда ёввойи ғозлар, қарғалар ва ўрдакларда парранда гриппи аниқланган. Шу боис бутун мамлакат бўйлаб ўн минглаб парранда ва қушларни йўқ қилиш бошланди.

Расмийлар биринчи марта H5N8 штаммини бир ҳафта олдин, турли штатларда қуш галалари ўлик ҳолда топилганидан кейин аниқлашган.

Ҳукумат парранда гриппи тарқалишининг олдини олиш учун шошилинч чоралар кўришни сўраган. Парранда гриппининг айрим штаммлари одамлар учун хавфли эканлиги боис ўлик ёки касал қушларга тегмаслик тавсия этилган. Баъзи туманларда парранда маҳсулотлари дўконлари ёпилган, ҳатто тухум сотиш ҳам тўхтатилган.

Шунга қарамай, ушбу вирус бошқа қушларга ҳам таъсир кўрсатаётгани айтилмоқда.

Масалан, Жанубий Керала штатида 12 мингга яқин ўрдак нобуд бўлган. Шу боис бу ерда 36 мингдан ортиқ қушларни йўқ қилиниши режалаштирилмоқда.

Мадхья-Прадеш штатида сўнгги 10 кун ичида юзлаб қарғаларнинг ўлгани хабар қилинган эди. Энди эса кабутарлар билан ҳам шундай ҳолат қайд этилган.

50 та қарғанинг ўлик танаси топилган Индоре шаҳри яқин атрофида яшовчиларни йўтал ва иситма каби аломатлар бўйича текширувдан ўтказмоқдалар.

Шимолий Харяна штатида ҳам юзлаб парранда ва қушларнинг ўлгани ҳақида хабар берилган бўлса-да, ҳудудда ҳали касаллик аниқланмаган.