Ҳуқуқни муҳофаза қилувчи органлар билан ҳамкорликда ёқилғи-энергия ресурсларидан самарали фойдаланиш ва уларни талон-торож қилинишини олдини олиш бўйича тизимли равишда профилактик ва назорат тадбирлари амалга ошириб келинмоқда.

Шунга қарамай, айрим истеъмолчилар томонидан ушбу ресурсларни талон-торож қилиш ҳолатлари ҳамон учрамоқда.

Мисол учун, 2023 йил март ойи Навоий вилоятида ўтказилган назорат тадбири давомида Қизилтепа тумани, «Маликобод» МФЙ ҳудудида жойлашган Когон магистраль газ қувурлари бошқармасига қарашли «Хўжа-Ҳасан» газ тақсимлаш станцияси саноат коллекторига ўрнатилган электрон газ ҳисоблагичга ташқи таъсир кўрсатилгани маълум бўлди.

Дастлабки ҳисоб-китобларга кўра, давлат манфаатларига етказилган умумий зарар миқдори 14,1 млрд сўмни ташкил этган.

Маълумот учун, ушбу саноат коллектори орқали тадбиркорлик субъектларига қарашли 3 та автомобилларга газ тўлдириш компрессор шохобчаси ва 3 та иссиқхона хўжаликларига табиий газ етказиб берилади.

Ушбу ҳолат юзасидан ҳозирги кунда ҳуқуқни муҳофаза қилувчи органлар томонидан дастлабки суриштирув ишлари олиб борилмоқда.