Кеча, 8 апрель куни 20 ёшгача бўлган футболчи қизлар ўртасидаги Осиё чемпионати мусобақасининг 3-тур ўйинлари якунланди.

Тур доирасида Владимир Панов бошчилигидаги Ўзбекистон U-20 қизлар терма жамоаси Иордания термаси билан куч синашди. Учрашув 4:0 ҳисобида Ўзбекистон термасининг ғалабаси билан якунланди.

Учрашувда ҳисоб 22-дақиқада Эътибор Шодиева томонидан очилди. Орадан 6 дақиқа ўтиб, Шаҳноза Деканбоева жамоамизнинг иккинчи голини киритди. Тайм якунида Ойдиной Тургунова ўзининг узоқ масофадан йўллаган ажойиб зарбаси билан ҳисобни 3:0 кўринишига келтирди. Биринчи бўлим шу ҳисоб билан якунланди.

Иккинчи бўлим сўнггида Тургунова ўз ҳисобига яна битта гол ёздириб қўйди. Шу тариқа Ўзбекистон миллий терма жамоаси гуруҳда 3 очко жамғарган ҳолда мусобақанинг чорак финалига йўл олди.

Ўйиндан сўнг, Ўзбекистон U-20 терма жамоаси аъзолари “Халқ сўзи” сайти учун махсус интервью беришди.

Эътибор Шодиева

“Бугун ўзгача ўйин бўлди. Барчамиз ғалаба қозонишга ишонган эдик. Буни уддалай олганимиздан, мураббийларимиз, раҳбариятимиз ва, албатта, ота-оналаримиз бизга билдирган ишончни оқлай олганимиздан хурсандмиз. Ўзбекистон халқини ғалаба билан табриклайман.

Насиб қилса, Хитойга қарши ўйинга ҳам жиддий тайёргарлик кўрамиз. Ушбу ўйинда ҳам ғалаба қозониб, Жаҳон чемпионати йўлланмасини қўлга киритиш ниятидамиз”, – дейди биринчи гол муаллифи.

Шаҳноза Деканбоева

“Бугунги ўйин жуда яхши бўлди. Ҳамма жонини бериб ҳаракат қилди. Ўйин қийин бўлишини билардик. Мураббийларимиз бизга берган кўрсатмаларни тўлиқ бажардик ва айнан шу сабаб ғалаба қозондик, деб ўйлайман.

Голим ҳақида гапирадиган бўлсам, аввало ушбу гол учун жамоадошларимга раҳмат айтаман. Сабаби менинг голим жамоавий ўйинимизнинг маҳсули бўлди.

Хитой терма жамоасига қарши, насиб этса, ҳаммамиз боримизни бериб, қўлимиздан келганча ҳаракат қиламиз. Насиб этса, албатта Ўзбекистонга мундиал йўлланмаси билан қайтамиз, деган умиддамиз”, – дея фикр билдирди иккинчи гол муаллифи.

Ойдиной Тургунова

“Бугунги ўйин зўр бўлди. Жамоамиз билан охиригача ғалаба учун курашдик. Мураббийимизнинг кўрсатмалари асосида бирдек ҳаракат қилдик. Бу ғалабамизнинг асосий сабаби бўлди.

Ғалаба учун, албатта, голлар керак. Бугун кўпроқ гол киритишга ҳаракат қилдик. Имкониятларимдан унумли фойдаландим. Бунда жамоадошларимнинг ҳам ҳиссаси катта бўлди. Уларга ҳам бунинг учун раҳмат айтаман.

Хитой терма жамоасига қарши муносиб ўйин кўрсатиб, ғалаба қилиш ниятидамиз. Насиб этса, Ўзбекистонга мундиал йўлланмаси билан қайтамиз. Бунинг учун охиригача курашамиз. Бизга ишонч билдирган барчага раҳмат”, – деди ўйин қаҳрамони.

Маълумот учун, Ўзбекистон U-20 терма жамоаси чорак финал ўйинини 11 апрель санасида ўтказади. Ушбу баҳсда жамоага Хитой термаси рақиблик қилади.

Муҳаммадамин Зуҳриддинов тайёрлади.