Маданий меросни ўрганиш, сақлаш ва оммалаштириш бўйича Бутунжаҳон жамиятининг Тошкентдаги ваколатхонасига Озарбайжон Миллий санъат музейи директорининг илмий ишлар бўйича ўринбосари Хадича Вели қизи Асадова ташриф буюрди.

«Ўзбекистон маданий мероси жаҳон тўпламларида» туркумидаги янги китоб-альбом тайёрлашнинг амалий масалалари муҳокама қилинди. Тўплам Озарбайжоннинг учта етакчи музейлари — Озарбайжон Миллий тарих музейи, Миллий гилам музейи ва Озарбайжон Миллий санъат музейидаги ўзбек коллекцияларига бағишланади.

— Озарбайжон Миллий санъат музейида турли мамлакатлар ва халқлар маданияти ва санъати билан боғлиқ кўплаб қизиқарли экспонатлар сақланмоқда. Ўзбек коллекцияси жуда хилма-хилдир. Бу XIX аср охиридаги сўзана, ямоқли дастурхон, кумуш сервиз, таҳорат учун тўплам, қўлда ясалган камар, кўк эмаль билан қопланган қутича – Бухоро амирининг совғаси. Шунингдек, нодир осори-атиқалар орасида 1905 йилда нашр этилган Қуръон факсимили ҳам бор», — дейди Озарбайжон Миллий санъат музейи директорининг илмий ишлар бўйича ўринбосари Хадича Вели қизи Асадова.

Унинг таъкидлашича, музейда таниқли ўзбек рассомларининг расмлари ҳам намойиш этилмоқда. Ўзбекистон коллекцияси жами 15 та экспонатдан иборат.

Китоб-альбомнинг алоҳида бўлимида Озарбайжон тарихи миллий музейи коллекцияси ҳақида сўз боради. Музей бош куратори, доцент Маҳфуза ҳожи қизи Зейналова онлайн тарзда ўтказилган йиғилишда бу ҳақда батафсил тўхталиб ўтди.

– Музейда 260 дан ортиқ экспонатдан иборат XIX аср ўзбек усталарининг ноёб буюмлари коллекцияси сақланмоқда. Булар абразив матолардан ясалган буюмлар, девор кашталари, латунь ва мис кўзалар, фируза билан қопланган ювиш мосламалари, ярим қимматбаҳо тошлар билан ишланган идиш-товоқлар, қурол намуналари, кийим-кечак ва бошқалар.

Бундан ташқари, Озарбайжон Миллий тарих музейида Сосонийлар, Араб ҳалифалиги, Салжуқийлар, Темурийлар, Шайбонийлар, Усмонийлар даврига оид тангаларнинг бой коллекцияси мавжуд.

Бухоро амири Саид Мир Абдул Аҳадхон (1885–1910) сурати музейнинг алоҳида фахридир. Суратнинг чап бурчагида қуйидаги ёзув бор: «Инглиз фотографияси. Боку», бу сурат амирнинг Бокуга ташрифларидан бирида олинганлигини кўрсатади.

Музейнинг махсус фонди экспонатлари — Бухоро амирининг совғалари — зарҳал кумушдан ясалган Қуръони карим учун ғилоф, шунингдек, кумуш ва тилла суви югуртирилган эмаль билан қопланган қора гравировка билан безатилган сервиз алоҳида эътибор талаб қилади», — таъкидлайди Маҳфуза ҳожи қизи Зейналова.

Китобнинг синов версияси жорий йилнинг ёзида бўлиб ўтадиган Жаҳон жамиятининг навбатдаги VII Халқаро конгрессида тақдим этилиши режалаштирилган.