АҚШнинг Калифорния университети олимлари Саҳрои Кабир келажакда яна гуллаб-яшнайдиган водийга айланишини башорат қилишмоқда.

Олимларнинг фикрига кўра, унинг пайдо бўлганидан бери бундай ўзгариш бир неча бор кузатилган.

Таъкидланишича, бир вақтлар гуллаб-яшнаган дашт бир неча минг йилда бир маротаба такрорланадиган сайёралар тебранишлари туфайли чўлга айланган. Ўшанда Ер 24,1 даражадан 23,5 даражага силжиган. Ва бундай ўзгариш натижасида Шимолий ярим шар қиш мавсумида Қуёшга яқинроқ келган. Саҳрои Кабир яшил маскан бўлган даврда эса бу яқинлашиш ёз ойларида кузатилган.

Олимларнинг ҳисоб-китобларига кўра, авваллари Шимолий ярим шар қуёш иссиқлигини 7 фоизга кўпроқ олган, бу эса ёғингарчилик миқдорини 17-50 фоизга оширган.

Саҳрои Кабирнинг бир неча бор яшил масканга айланганини олимлар океан чўкинди жинсларини таҳлил қилиш натижасида аниқлашган.

Қайд этилишича, Шимолий ярим шардаги навбатдаги ўзгариш, тадқиқотчиларнинг тахминларига кўра, 10 минг йилдан кейин содир бўлади ва ўша пайтда чўл қумлари яна ўт ва буталар билан қопланади.

Аммо олимларнинг таъкидича,  ушбу табиий жараёнга иссиқхона газлари таъсири халақит бериши мумкин экан