Фото: Прокуратура департаменти 

Қорақалпоғистон Республикаси ва Наманган вилоятида ижтимоий соҳа объектларини иситиш учун етказиб берилган кўмирни талон-торож қилиш ҳолатлари аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, Нукус туманида ўтказилган терговга қадар текширувда давлат хусусий шерикчилик битимига асосан кўмир етказиб берувчи «Н.А.» МЧЖга ижтимоий соҳа объектларини иситиш учун етказиб берилган кўмир ўлчовдан ўтказилганида, МЧЖ масъул шахслари умумий баҳоси 1 млрд сўмлик жами 2 514 тонна кўмирни талон-торож қилгани аниқланган.

Шу каби, Наманган вилоятида ўтказилган терговга қадар текширувда давлат хусусий шерикчилик битимига асосан кўмир етказиб берувчи «О.Д.» МЧЖ раҳбари О.Қ. ва бошқалар куз-қиш мавсумида Косонсой туманидаги бюджет ташкилотларини иситиш учун ажратилган умумий баҳоси 263,1 млн сўмлик 609,9 тонна кўмирни бошқа шахсларга қиммат нархларда сотиб юбориб, талон-торож қилгани фош этилган.

Департаментга кўра, ҳозирги кунда мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.