Норвегия жорий йилнинг март ойида нефть экспортидан рекорд даражада даромад олганини маълум қилди. Бу ҳақида BILD нашри хабар берди.

Расмий маълумотларга кўра, мамлакат бир ой давомида 57,4 миллиард Норвегия кронаси, яъни тахминан 5,2 миллиард евро миқдорида нефть сотган. Бу кўрсаткич ўтган йилнинг шу даврига нисбатан қарийб 68 фоизга юқори кўрсаткич ҳисобланади.

Мутахассислар бундай кескин ўсишни глобал энергетика бозоридаги беқарорлик, хусусан, Эрон билан боғлиқ геосиёсий кескинликлар фонида нефть нархларининг ошгани билан изоҳлашмоқда.

АҚШ президенти Доналъд Трамп ушбу ҳолатга муносабат билдириб, Буюк Британияни ўз нефть қазиб олиш ҳажмини оширишга чақирган. Оқ уй раҳбарининг таъкидлашича, Европада жиддий энергия танқислиги кузатилмоқда, бироқ Лондон Шимолий денгиздаги конларни фаол ўзлаштиришга шошилмаяпти.

Шунингдек, Трамп Норвегия ўз нефтини Буюк Британияга икки баравар қиммат нархда сотаётганини ва бундан катта фойда олаётганини танқид қилган.

Маълумот учун, Норвегия ҳозирда Европанинг энг йирик нефть ишлаб чиқарувчиси ҳисобланиб, Германия учун асосий етказиб берувчилардан бири ҳисобланади. 2025 йил якунларига кўра, Норвегия Германия хом нефть импортининг 16,6 фоизини таъминлаган.