Фото: Reuters

Украина билан боғлиқ вазият фонида НАТО етакчилари бош котиби Йенс Столтенбергнинг ушбу лавозимдаги мандатини яна бир йилга узайтиришга келишиб олган. Бу ҳақда Столтенберг ўзининг «Твиттер»ига ёзган.

«НАТО етакчиларининг бош котиблик муддатимни 2023 йил 30-сентабргача узайтириш ҳақидаги қароридан мамнунман. Биз авлодларимиз катта хавфсизлик инқирозига дуч келар экан, иттифоқимиз бирлигини сақлаб, халқларимиз хавфсизлигини ҳимоя қиламиз», деб ёзган сиёсатчи.

Столтенбергнинг НАТО бош котиблигидаги ваколати шу йилнинг сентабрида тугаши керак эди. Бунгача альянс аъзолари янги бош котибни аниқлаштириб олиши керак эди. Сиёсатчи истеъфога чиққанидан сўнг жорий йилнинг 1 декабридан Норвегия Марказий банки раҳбари лавозимини эгаллаши кутилаётганди.

Аввалроқ НАТОга аъзо мамлакатлари етакчилари Брюсселдаги саммитда ташкилот бош котиби Йенс Столтенбергнинг мандатини узайтириш ҳақида қарор қабул қилиши мумкинлиги кутилаётгани ҳақида хабарлар тарқалган эди.

Маълумки, 24 февраль куни Россия президенти Владимир Путин ЛХР ва ДХР раҳбарларининг ёрдам сўровига жавобан Донбассни ҳимоя қилиш учун «махсус ҳарбий операция» бошлади. Шундан сўнг Россия ҳарбий кучлари Украина ҳудудига киритилди.

Бунга жавобан Украина Россия билан дипломатик алоқаларини узди. Кўплаб давлатлар Россияга, жумладан, Европа Иттифоқи мамлакатлари Россия президенти Владимир Путин, ташқи ишлар вазири Сергей Лавров, қатор расмийлар, тадбиркорлар ва журналистларга қарши санкциялар киритди.