Фото: Reuters

НАТО Бош котиби Йенс Столтенберг «Economist» нашрига берган интервьюсида ягона Европа армиясини яратишга қарши чиқди. Унинг фикрича, бу альянс функцияларини такрорлайди.

«Европа Иттифоқининг мудофаа харажатларининг оширишини маъқуллайман. Аммо Европа Иттифоқи НАТО ўрнини боса олмайди. НАТОнинг европалик ҳамкорлари альянснинг умумий мудофаа харажатларининг 20 фоизини ташкил қилади», — деди Столтенберг альянс мудофаа харажатларининг 80 фоизи Европа Иттифоқидан ташқаридаги давлатларга тўғри келишини таъкидлаб.

Шу ўринда Столтенберг НАТО асосий қўмондонлик тузилмаси бўлиши кераклигини қўшимча қилди.

«Биз хавф-хатарларни ҳисобга олишимиз керак… Агар бир хил давлатлар томонидан яратилган муқобил қўмондонлик тузилмалари мавжуд бўлса, у ҳолда НАТО такрорланади», — дейди Бош котиб.

Шу йилнинг март ойида Европа Иттифоқининг ташқи ишлар ва хавфсизлик сиёсати бўйича Олий вакили Жозеп Боррель ягона умумевропа армиясини яратиш мақсадида Европа Иттифоқига аъзо 27 давлатнинг қуролли кучларини тарқатиб юбориш ғоясини реал эмас, деганди.

Олдинроқ, Италия бош вазири ўринбосари ва ташқи ишлар вазири Антонио Таяни Европа Иттифоқи тинчликни сақлаш ва можароларнинг олдини олишда роль ўйнаши мумкин бўлган ўз қуролли кучларини шакллантириши кераклигини айтган эди.