Вилоят бўйича 201 минг тонна пахта тайёрланиб, бу соҳадаги режа қисқа муддат — ўтиз беш кун ичида мамлакатда тўртинчи ўринда уддаланди.

Аграр соҳа, хусусан, пахтачиликка бўлган эътибор натижасида кўзда тутилган хирмонга яраша ҳосил тўпланди. 7 та кластерга бирлашган 1849 та фермер хўжалиги билан ерларни экишга тайёрлашдан тортиб ҳосилни йиғиштириб олишгача бўлган агротехник тадбирлар, шунингдек, иш ҳақи, техника, минерал ўғит ва ёнилғи мойлаш материаллари етказиб бериш билан боғлиқ шартномавий мажбуриятлар ижроси изчил бажарилганлиги ютуқларнинг асосий омили бўлганлигини таъкидлаш ўринлидир. Айниқса, терим мавсумидаги катта сафарбарлик — белига этак боғлаганлар сонининг  184 минг кишидан ортгани кунлик иш суръатига қанот бағишлади. Теримчилар меҳнати ўз вақтида ҳисоб-китоб қилиниб, уларга ҳозирги кунга қадар 180 миллиард 866,7 миллион сўм иш ҳақи тўлаб берилди.

Деҳқончиликни ташкил этишда кластер усулининг йўлга қўйилиши дала ишларини механизациялаштириш даражасини юксалтириш имконини бермоқда. Бу, масалан, ҳосилни йиғиб-териб олиш олишда замонавий техника воситаларидан тобора кўпроқ фойдаланилаётганида яққол кўзга ташланади. Биргина, “Art soft tex” кластери томонидан жорий йилнинг ўзида  32 та юқори унумли терим машиналари сотиб олинди. Умуман олганда, Поп, Мингбулоқ, Учқўрғон туманларида 45 та терим машинаси ишлатилиб, улар кучи билан 6000 тоннадан зиёд ҳосил йиғиштирилди.

Айтиш лозимки, бугунги кунда Наманганда етиштирилган пахта ҳосили тўлалигича вилоятнинг ўзида қайта ишланмоқда. Жойларда фаолият кўрсатаётган йигирув-тўқув, бўяш, тикувчилик корхоналарида технологик жараёнларнинг изчил йўлга қўйилганлиги натижасида экспортда пахтадан тайёрланган тайёрланган тайёр маҳсулот салмоғи мунтазам ортиб бораётир.

Режа бажарилди. Бироқ, пахтазорлардаги шижоат асло сусайгани йўқ. Катта майдонларда ҳали ҳосил бор. Ҳисоб-китобларга кўра, яна 20 минг тоннага яқин қимматбаҳо саноат хом ашёси йиғиб олинади.

Қудратилла НАЖМИДДИНОВ
(«Халқ сўзи»)